متضررو “المحج الملكي”:باقين ما استفدنا لا من سكن لا من تعويض.. وحتى مسؤول ما جا عندنا.. راه شردونا وخدمة المواطن ماشي غير فالحملة الانتخابيّة .

مصدر الصورة

أميمة عطية – كود كازا ///

رجعات، اليوم الخميس 23 يوليوز 2026، عدد من الأسر المتضررة من عمليات الهدم المرتبطة بمشروع “المحج الملكي” فالمدينة القديمة بالدار البيضاء، كتحتج قدام مقر مقاطعة سيدي بليوط، بعدما أكدت أنها مازال ما استفدات لا من بارطمات بديلة ولا من أي تعويض، رغم مرور شهور على هدم ديورهم.

ورفعو هاد المحتجون لافتات كتعبر على الغضب ديالهم، من بينها: “خدمة المواطن ماشي غير فالحملة الانتخابية”، معتبرين أنهم تحولو غير لوسيلة في الحملات الانتخابية، وأن الوعود اللي تعطات ليهم قبل الهدم ما تطبقاتش وما تنفذاتش على أرض الواقع.

وأكد عدد من المتضررين، فتصريحات لـ”كود”، أنهم باقين “ما طلعوش فالسيستيم”، بمعنى أن أسماءهم مازال ما بانتش ضمن لوائح المستفيدين، رغم أنهم دارو جميع الإجراءات الإدارية اللي طلبات منهم من بعد الهدم.

وزاد عدد منهم، فتصريحات لـ”كود”، أن المسؤولين ما جاوش عندهم وما فتحوش معاهم حتى حوار، مؤكدين أنهم عياو من الانتظار ومن الوعود اللي وصفها واحد منهم بـ”البوماضة الصفارة”، اللي غير كتدهن الوضع مؤقتاً بلا حتى نتيجة على أرض الواقع.

ومن جهتها، عبرات واحدة من بنات درب موحا أوسعيد على الغضب ديالها، وكالت ل ” كود” إنها
“تشردات هي ووليداتها”، وأكدت أنها ماشي ضد تطور ولا ضد المشاريع اللي غادي تنفع المدينة، ولكن ضد هدم البيوت بلا توفير حل بديل يحفظ كرامة ديالها حيت حالتها لمادية ضعيفة وولات كتقلب غير علو لقوت ليومي وتزادها عبء لكرا ، خصوصاً وأنها كتعيش وضعية اجتماعية ومادية صعيبة.

ىزادت ، لمتحدثة وكالت ، أن الوعود اللي تعطات ليهم قبل هدم ديور بقات غير كلام، وندمان حيت خرجات حيت ما كان حتى إجراء عملي لتنفيذ لوعود ، مطالبة السلطات بالتدخل العاجل لتسوية الملفات وإنصاف جميع المتضررين بلا إقصاء.

وكانت عمليات الهدم اللي عرفتها أحياء من المدينة القديمة تدخلات فإطار مشروع “المحج الملكي”، اللي كيراهن عليه المسؤولون باش يعاود يهيكل المنطقة ويحولها لواحد الفضاء الحضري الكبير. غير أن الأسر المحتجة كتشدد أن أي مشروع تنموي خاصو يواكب بحماية حقوق الساكنة، وتوفير حلول سكنية وتعويضات قبل هدم المنازل، باش ما تلقاش العائلات راسها مشرّدة بلا مأوى.