الأنظار متجهة هاد الايام كلها لحدث التحاق فوزي لقجع، جوكير الميزانية والكورة، لحزب الاصالة والمعاصرة، وللي مرتقب يكون هاد السبت فلقاء المجلس الوطني للبام.

التحاق لقجع للبام، وفق مصادر حزبية هضرات مع “گود”، هو انقاذ للبام فالانتخابات من جهة، ومن جهة ثانية باش يقود حرب سياسية واعلامية وانتخابية ضد المنافس القوي له. واللي هو حاليا فالساحة الحزبية عزيز اخنوش، رئيس الحكومة الحالي وزعيم الأحرار.

سياسيا سالات القطبية، للي كانت بين البام والبي جي دي وسالات بخسارة البام للانتخابات ف 2016 رغم الامكانيات والدعم للي كان عند تراكتور. ولكن للي قادر يوقف زحف الاسلاميين (اضافة الى ذهاء وذكاء الدولة) مور توقيع التطبيع. كان هو حزب الاحرار ف 2021، فهزيمة قاسية للاسلاميين. تسونامي ضرب قلعة البي جي دي.

اليوم، البي جي دي، وفق قيادي بارز فالأمانة العامة ل”گود” :”منهك..وغير قادر على المواجهة والمنافسة، وفاهم بللي الدولة لا ترغب فيه في هذه المرحلة..ولكن التحاق لقجع للبام، غايرجعنا لنفس الشعارات السابقة ديال مواجهة التحكم”. مضيفا. :”هاد الشعار للاسف ماشي وقتو، واطراف ف الامانة العامة ومعهم بنكيران باغين مواجهة لقجع ف حالة اعلان التحاقو رسميا..ودبا واش بنفس الخطاب غانواجهو لقجع؟.

البي جي دي ضعيف انتخابيا وداخليا، ميقدرش يدخل بقوة للمنافسة على رئاسة الحكومة، والاستقلال بان ضعيف وداخل بنفس الفريق ديال 2021 مقدرش يدير استقطابات قوية .. للي بقا فالمنافسة الشرسة هوما البام والاحرار.

البام موجد للحرب السياسية والاعلامية بجوكير الميزانية، بعدما تبين بلي القيادة الجماعية الحالية مقادراش تواكب وتنافس الاحرار للي عندو اخنوش جوكير قوي وزعيم باقي كيتحرك فالكواليس بقوة باش يربح الاحرار.

اذا استمر هاد الوضع، غانشوفو قطبية بين حزبين كيتشاركو فبزاف، قياداتهم كلهم كانو ضمن حركة لكل الديمقراطيين. وصنعاتهم الدولة .
اذن غاتكون مواجهة السنة الانتخابية بين لقجع واخنوش. بزوج كاريزما ورجال دولة. بزوج عندهم نقط قوة كثيرة، وعندهم اختلاف ف الاسلوب ديال التواصل والتدبير ووو. لكن كيجمعهم حب الوطن وخدمة المغرب والملكية.