باش تحد من الانبعاثات والتلوث وتحسن جودة لعيش ديال 3.2 ملايين بيضاوي.. جماعة كازا كتطلق مخطط المناخ بدعم من البنك الدولي.. واش غادي إنجح قبل من 2028؟ .

مصدر الصورة

أميمة عطية – كود كازا ///

طلقت جماعة الدار البيضاء مسار إعداد مخطط الدار البيضاء للمناخ، بدعم من البنك الدولي، فواحد الورش اللي كيراهن على مواجهة التغيرات المناخية، والحد من الانبعاثات والتلوث، وتحسين جودة العيش ديال ساكنة العاصمة الاقتصادية.

هاد المشروع ، لي كيجي فإطار تنزيل برنامج عمل الجماعة 2023-2028، وكيهدف لإعداد خارطة طريق متكاملة كتحدد أولويات العمل المناخي فالمدينة، وتقوي قدرتها على التكيف مع التحديات البيئية خلال السنوات المقبلة.

وحسب بلاغ كتوفر “كود” على نسخة منو، دخل المخطط مرحلة التنفيذ، بعدما شرعات مصالح جماعة الدار البيضاء، بتنسيق مع أطر البنك الدولي ومختلف الشركاء المؤسساتيين، فجمع المعطيات وإنجاز التشخيصات التقنية اللي غادي تشكل الأساس لإعداد الاستراتيجية المناخية المستقبلية للمدينة.

وغادي يشمل المخطط مجموعة من القطاعات الحيوية، من بينها النقل، والطاقة، والماء، وتدبير الأزبال ، والتعمير، والبنيات التحتية، والتنوع البيولوجي، بهدف تقليص انبعاثات الغازات المسببة للاحتباس الحراري، وتحسين البيئة الحضرية، وتوجيه الاستثمارات نحو مشاريع أكثر استدامة.

وفهاد السياق أكدت نبيلة الرميلي رئيسة مجلس جماعة الدار البيضاء في نفس لمصدر ، أن مخطط الدار البيضاء للمناخ كيشكل محطة أساسية فمسار مستقبل المدينة، وكيعكس إرادة مشتركة لجعل الانتقال المناخي رافعة لتحقيق التنمية المستدامة، وتعزيز قدرة المدينة على الصمود، والرفع من جودة عيش البيضاويين.

ومن جهتو، أكد عبد الرحيم أوطاس، نائب رئيسة مجلس جماعة الدار البيضاء المكلف بالتعاون الدولي، أن المخطط كيمثل مرحلة جديدة فتعزيز إشعاع المدينة على المستوى الدولي، من خلال الاستفادة من خبرات البنك الدولي وتبادل التجارب داخل شبكة C40، اللي كتضم حوالي 100 مدينة عالمية ملتزمة بالعمل المناخي.

وللإشارة فقط، فكازا اللي كيتجاوز عدد سكانها 3.2 ملايين نسمة، كتعرف تحديات مناخية متزايدة بحكم حجمها ومكانتها كقلب اقتصادي للمملكة، وهو ما كيخلي هاد المخطط من بين الأوراش الاستراتيجية اللي غادي تحدد مستقبل العمل المناخي فالمدينة وغادي ايبقا تحت لمراقبة لأنو غادي يواجه تحديات فتنزيل.

ومن المرتقب عرض أولى النتائج المرحلية للمخطط مع نهاية شهر شتنبر 2026، قبل إعداد خارطة الطريق العملية اللي غادي توجه العمل المناخي بالدار البيضاء خلال السنوات المقبلة