الاستقلال سالا مع أغلب تزكيات كازا.. وعين الشق باقية شاعلة واسم بنبي طالع فالكواليس .

مصدر الصورة

كود كازا//

حسمات اللجنة التنفيذية ديال حزب الاستقلال، فاجتماعها اللي دار اليوم الأربعاء 22 يوليوز، فالأغلبية ديال المرشحين ديال الحزب اللي غادي يدخلو غمار الانتخابات التشريعية المقبلة فكازا، وخلات غير دائرة عين الشق بلا قرار نهائي، بعدما تأجل الحسم فيها لجلسة جاية، من بعد خاوية في عامرة اللي دار ليهم البرلماني شفيق عبد الحق.

وبهاد القرار، باين باللي عين الشق مازال فيها شد الحبل داخل الحزب، خصوصا وأنها من أكثر الدوائر اللي كتعرف تنافس قوي على التزكية.

وحسب المعطيات، فالحزب تراجع على ترشيح عبد الحق شفيق، اللي كان خدا من قبل تزكية أولية، ودابا كاين تداول على أكثر من اسم باش يشد البلاصة، ومن بينهم البرلماني الحالي إسماعيل بنبي، اللي كيتقدم كواحد من أبرز الأسماء المطروحة.
أما فدائرة ابن امسيك، فاللجنة التنفيذية حسمات النقاش وصادقات على ترشيح محفوظ تهريس، اللي جا من حزب الأصالة والمعاصرة، وهاد القرار سالا الجدل اللي كان داير على إمكانية تزكية حياة بركة، العضوة فمجلس جهة الدار البيضاء-سطات وغرفة التجارة والصناعة والخدمات.

وبالنسبة لباقي الدوائر، الحزب بقى محافظ على الاختيارات اللي كان حسم فيها من قبل، بحيث زكى حسان البركاني فدائرة أنفا، ورشيد أفيلال فعين السبع، والحسين نصر الله فالفداء، وهشام الجيد فسيدي مومن، ومحمد الركاني فالحي الحسني، وعبد الإله المهداوي فسيدي عثمان.
وبهاد الشكل، كتبقى عين الشق هي الاستثناء الوحيد فخريطة مرشحي الاستقلال فكازا، وسط انتظار باش يعلن الحزب شكون غادي يمثل الميزان فهاد الدائرة اللي معروفة بالحسابات التنظيمية والسياسية المعقدة، واللي التنافس على تزكيتها مازال ما سالاش.