واش إحصاء “البوعارة” فمولاي رشيد وسيدي عثمان غادي يكون أول خطوة باش يتنظم قطاع النظافة فكازا وتنقا المدينة؟ .

مصدر الصورة

أميمة عطية كود كازا ///

بدات السلطات بمدينة الدار البيضاء فعملية ديال إحصاء “البوعارة”، اللي كيجمعو الزبل وتحديدا المواد القابلة لإعادة التدوير من الباركاصات، وهادشي كيجي قبل ما تبدا “شرطة النظافة” بالعاصمة الاقتصادية.

وحسب المعطيات المتوفرة، فإن هاد العملية الميدانية بدات فعليا فحي مولاي رشيد وسيدي عثمان، قبل ما يتم تعميمها على باقي المقاطعات والأحياء التابعة للتراب الجماعي للدار البيضاء.

هاد العملية بدات بمنطقتي مولاي رشيد وسيدي عثمان، حيت كاينين “البوعارة” بزاف لي كينشطو وكيستقرو تماك، وخاص الإحصاء يبدا من هاد الأماكن .

وزادت المعطيات نفسها، أن الهدف من هاد الإحصاء هو حصر عدد “البوعارة” وتنظيم هاد النشاط، تمهيداً لإدماج جزء منهم داخل المنظومة الجديدة الخاصة بفرز وتثمين النفايات، والحد من المظاهر العشوائية لي كتكون فالشارع العام.

وفالسياق نفسو، غادي تعرف الدار البيضاء مشروع جديد ولي هو “شرطة النظافة”، اللي غادي تسهر على مراقبة احترام قوانين النظافة وزجر المخالفين اللي كيرميو النفايات خارج الحاويات المخصصة لها.

وغادي تتكون “شرطة النظافة” من موظفين يتم اختيارهم من مختلف مقاطعات المدينة، مع إخضاعهم لتكوين خاص قبل ما يبداو الخدمة.

وللإشارة فقط، فمجلس جماعة كازا كان صادق فدورتو الاستثنائية ديال شهر يونيو لي فات على قرارات كتهم إعادة تنظيم قطاع النظافة، من بينها تدبير المرفق العمومي فبعض المقاطعات، وتتبع خدمات الشركات المفوض لها، وتدبير المرحلة الانتقالية ديال المطرح ومصنع معالجة النفايات، وتحويلات فاختصاصات النظافة بين عدد من المقاطعات باش تتحسن الخدمة، بميزانية كتبلغ 133 مليار سنتيم.