نفى المكتب الوطني للسلامة الصحية للمنتجات الغذائية (أونسا) الإشاعات اللي رايجة فالسوشيال ميديا على أن الدلاح المغربي كيسبب التسمم ،وأكد المكتب، ومعاه مهنيين فالقطاع الفلاحي، أن الدلاح اللي كيتباع فالمغرب سالم، وكيحترم جميع المعايير الصحية المعمول بها وطنياً ودولياً.

كيف ما وضحات “أونسا” أنها دارت، حتى اخر يونيو 2026، تحاليل لكثر من 5600 عينة ديال الخضرة والديسير من مختلف جهات المملكة، من بينها 557 عينة ديال الدلاح، النتائج بينات أن جميع العينات مطابقة للمعايير الصحية، وما فيها حتى مشكل.

حتى على المستوى الأوروبي، ما كاين حتى إنذار بخصوص الدلاح المغربي، نظام الإنذار السريع ديال الاتحاد الأوروبي ما سجل حتى حالة كتخص الدلاح المغربي من 2023، اما عدد الإشعارات المتعلقة بجميع الخضر والفواكه المستوردة وصل لـ625 إشعار، وكان نصيب المغرب منها غير 3 حالات، وماشي مرتبطة بالدلاح.

المهنيين قالو بلي بعض حالات التسمم اللي كتوقع ما عندها حتى علاقة بجودة الدلاح، ولكن كتكون بسبب طريقة شارج من بعد ما يتحمل من لارض ،حيث الدلاح فيه نسبة كبيرة ديال الما ،كيقدر يخسر دغيا إلا بقى برا الثلاجة وسط السخونية، وكيولي معرض لتكاثر البكتيريا ،داكشي علاش نصحو الناس يدخلوه للثلاجة مباشرة من بعد التقطاع، وفدرجة حرارة ما تفوتش 8 درجات.

وزادو حذرو من شراء الدلاح المقطوع أو اللي كيبقى تحت الشمس ، لحقاش هاد الظروف كتأثر على الجودة ديالو، ونصحو المستهلكين يتفاداو أي دلاحة باينة فيها علامات غير عادية.

وأكد المهنيون كذلك أن تصدير الدلاح المغربي للأسواق الخارجية، خصوصاً الأوروبية اللي كتستقبل أكثر من 70% من الإنتاج الوطني، مازال دايز بشكل عادي وتحت مراقبة صحية صارمة.

أما فالسوق المغربية، فالطلب على الدلاح ما تأثرش بالإشاعات، والمشكل الحقيقي اللي كيواجه الفلاحة دابا هو كثرة الإنتاج مقارنة مع الطلب، الشي اللي خلا الأثمنة تهبط بشكل باين.