أسعار النفط العالمية طلعات لـ85 دولار.. واش لمازوط فالمغرب غادي يدزاد؟ .

مصدر الصورة

أميمة عطية كود كازا ///

عرفات أسعار النفط العالمية ارتفاع جديد، اليوم الثلاثاء 14 يوليوز 2026، بعدما زادت بحوالي 2 في المائة، ووصلات لأعلى مستوى ليها فـ4 أسابيع، وسط مخاوف فالأسواق من تأثير التوترات الجيوسياسية على تدفقات الطاقة.

وارتفعات العقود الآجلة لخام “برنت” بـ1,68 دولار، أي بنسبة 2 في المائة، باش توصل لـ84,98 دولار للبرميل، فيما سجل خام “غرب تكساس الوسيط” الأمريكي ارتفاع بـ1,65 دولار، بزيادة 2,1 في المائة، ليستقر فـ79,79 دولار للبرميل.

هاد الارتفاع جا فظل القلق اللي كاين فالسوق الدولية بسبب التوترات المرتبطة بالشرق الأوسط، خصوصاً مع المخاوف حول مضيق هرمز، اللي كيشكل واحد من أهم الممرات البحرية لنقل النفط فالعالم.

وبالتالي فأي اضطراب فهاد المنطقة كيخلي الأسواق تخاف من احتمال تأثر الإمدادات، وبالتالي كيرتفع الضغط على الأسعار.

وزاد هاد القلق بعدما سجل خام “برنت” قفزة قوية فالجلسة اللي فاتت بنسبة 9,6 في المائة، وهي من أكبر الارتفاعات اليومية اللي عرفها فسنوات، بسبب تخوف المستثمرين من استمرار التوترات وتأثيرها على حركة شحن الطاقة.

وكتبقى أسعار النفط مرتبطة بشكل كبير بأي مستجدات سياسية أو أمنية فالمناطق المنتجة، حيث أن الأسواق كتتفاعل بسرعة مع الأخبار اللي كتهم الإنتاج أو النقل، خصوصاً ملي يتعلق الأمر بممرات استراتيجية بحال مضيق هرمز.

ودابا كيبقى سوق النفط كيراقب التطورات المقبلة، بحيت أي تصعيد جديد أو اضطراب فحركة الإمدادات يقدر يزيد يضغط على الأسعار العالمية فالمغرب أو خارجو، بينما أي انفراج فالأوضاع يقدر يخفف من هاد التوتر اللي فلأسواق.