ها علاش خاص سيدنا يبقى بعيد. فاش غلبو الاسود قال وهبي باللي تطور الكورة بفضل استثمارو فالرياضة وفاش خسرو ما قالش لينا السباب. ايلى قحمتي الملك راه فالرباح والخسارة. وا لعبو وخليو عليكم سيدنا فالتيقار .

مصدر الصورة

محمد سقراط-كود///

فاش غلب المنتخب المغربي صرح محمد وهبي مدرب الاسود بأن تطور الكرة المغربية وانجازاتها جا بفضل العناية ديال سيدنا واستثماره في الرياضة، وفاش خسرنا ضد فرانسا فربع كأس العالم 2026 ماقالش لينا هاد المدرب شكون سبب الخسارة، وهذا ماشي تصريح غير لوهبي راه وزراء منتخبون ومسؤولين كلهم كيقحموا سيدنا في أي حاجة ومسؤول على كولشي بحال الى هوما مكاينينش ولا دور لهم، لدرجة ان المواطن حاليا كيعرف غير سيدنا وفحاجات بسيطة، كتلقى مرة مضاربة مع راجلها هارب عليها بالنفقة وحتى هي بغات سيدنا يتدخل، مول كروصة في الشارع بغا سيدنا يتدخل، واحد تلاجج مع موظف في مقاطعة باغي سيدنا يتدخل، وراه كيتدخل في بعض الحالات ولكن مايمكنش يقابل كل مواطن وإدارة و وزارة والبلاد كلها، راه إنسان. بلاد فيها مؤسسات ومسؤولين ما كيديروش خدمتهم ومخبيين ورا “سيدنا”.

وهاد الفكرة ديال الملك راه إنسان وماشي نصف إله هي للي حرس سيدنا يبينها لينا من نهار طلع للعرش، يتحرك بلا قوة البروتوكول، يمكن تلاقاه تصور معاه، كيلبس شنو بغا، كنعرفوا الاسرة ديالو كاملة، دابا نيت يمكن تهبط للشمال وتلقاه دايز، مكاين لا سرعة لا قوة رجال الامن لا والو، كيوقف في السطوبات كيحتارم قانون السير، كيتنقل بلا موكب كبير وبلا قطع الشوارع، وحتى في الخطب راه كيقولها واضحة راه عندكم انتخابات نتاخبوا الناس الصالحين لي غادين يسيروا أموركم، إذن علاش هاد الإصرار المبالغ فيه في إقحام سيدنا في أيتها حاجة وفي أي ربح، حيت راه كاينة حتى الخسارة تابعة الربح وداك الساعة شكون المسؤول عليها.

بالنسبة ليا يجب عدم إقحام سيدنا في كل تصريح لشي مسؤول على شي حاجة من بعد أي انجاز او فوز، الحياة فيها الربح والخسارة والمنطقي هو الى غادي يكون سيدنا مسؤول على الربح راه طبيعي يكون مسؤول حتى على الخسارة، إيوا مالنا على هادشي، راه كاين دولة وحكومة ومؤسسات وأجهزة كل واحد فيها مسؤول على نتائج شنو كيدير، وطبعا سيدنا على رأس هادشي، ولكن ماشي رئيس جماعة مدوز قادوس فشي خلى يبدى هدرتو هادشي بفضل السياسة دسيدنا دفك العزلة على العالم القروي، وإلى تهرس القادوس آش نديرو، بحال الى المجهود لي دار كامل لأنسنة صورة الملك عند المواطنين، كتضرب في الزيرو بهاد التصريحات المبالغ فيها، يجب عدم اقحام سيدنا في ايتها حاجة.