الخلية الإرهابية اللي طاحت اليوم.. طوموبيل كانت واجدة تدير عملية تفجير انتحاري ولا دهس ضد منشآت حساسة ومخطوطات متطرفة مشروح فيها كيفاش كتركب العبوات الناسفة (تصاور) .

عمر المزين – كود///

عملية أمنية نوعية كبيرة تدارت اليوم الإثنين بين عدد من المدن المغربية. هاد العملية نقذات بلادنا من مخططات إرهابية خطيرة وصلات لمراحل جد متقدمة، وكان الفضل فتفكيك خيوطها لمصالح المديرية العامة لمراقبة التراب الوطني المعروفة اختصارا بـ”الديستي” اللي قدمات معلومات استخباراتية دقيقة بخصوص هاد العملية.

هاد العملية الأمنية، حسب بلاغ سابق للمكتب المركزي للأبحاث القضائية، دارتها عناصر القوة الخاصة التابعة للديستي واللي باشرات عمليات التدخل والتوقيفات بشكل متزامن في مدن أكادير وتارودانت والدار البيضاء والحاجب وتطوان والفقيه بن صالح وأسفي.

العمليات ديال التفتيش اللي تدارت فهاد العملية الأمنية النوعية مكنات أزياء عسكرية ومخطوطات ذات طابع متطرف، تتضمن شروح تفصيلية لكيفية تركيب العبوات الناسفة، علاوة على حجز دعامات رقمية ومحتويات بصرية، من بينها تسجيلان يتضمنان نص إعلان البيعة لتنظيم “داعش” وتهديدات صريحة بارتكاب أعمال تخريبية داخل المغرب.

هاد العمليات الأمنية الناجحة ديال الديستي موقفاتش حد هنا. بلا مشات لواحد الكراج كاين فمدينة إنزكان اللي كانت فيه طوموبيل (كاط كاط) وكان تم تعديل خزان وقودها داخل شي ورشة سرية لتمكينها من الاشتغال بغاز البوتان، وذلك بغرض استعمالها في تنفيذ عمل إرهابي عبر عملية تفجير انتحاري أو دهس ضد أهداف ومنشآت حساسة.

يذكر باللي هاد المخططات الإرهابية اللي كانت بالغة الخطورة وصلات لمراحل متقدمة من التحضير والإعداد، وكانت تستهدف المساس الخطير بالنظام العام وبأمن الأشخاص والممتلكات، وانخرط في تنفيذها متطرفون يعملون بتنسيق لوجيستي ودعم عملياتي مع فرع تنظيم “داعش” الإرهابي بمنطقة الساحل الإفريقي.

مصدر الصورة مصدر الصورة مصدر الصورة مصدر الصورة مصدر الصورة