من غير المنطقي أن موظف في الرشيدية كيخرج من دارو كيلقى غير الحمان والشوم، يخلص نفس الضريبة لي كيخلص موظف رباطي كيخرج من دارو في سلا وكيشد الترام للرباط و كيلقى غير الخضورة والجرادي والمولات والسينمات والشوارع النقية والپاركات والغابات الحضرية، فيناهي العدالة الضريبية؟ .

مصدر الصورة

محمد سقراط-كود///

من غير المنطقي أن موظف في الرشيدية كيخرج من دارو كيلقى غير الحمان والشوم، يخلص نفس الضريبة لي كيخلص موظف رباطي كيخرج من دارو في سلا وكيشد الترام للرباط وكيلقى غير الخضورة والجرادي والمولات والسينمات والشوارع النقية والپاركات والغابات الحضرية، فيناهي العدالة الضريبية هنا غير معقول واحد معندوش طريق سيار وحتى السكة ديال التران ماواصلاش، الحرارة فايتة ربعين ومعندوش مسبح بلدي قد ديال الرباط ومع ذلك يخلص گاع الضرائب ديالو بحال بحال واش هادي هي الجهوية الموسعة والعدالة الضريبية.

واحد في عين بني مطهر كيدوز نص العام حمان والنص لاخور عجاج حمر بحال ديال نهاية العالم في ماد ماكس، ومع ذلك إلى بغى يبيع دار او يدير شركة او غير مقاول ذاتي يخلص الضريبة بحالو بحال واحد في كازا، كيقادوليه كورنيش بادي من زناتة وغادي يسالي في البير الجديد، مدينة كبيرة قطب اقتصادي ضخم مروجة والخدمة موجودة، وراه خاص حتى الصاليرات والسميك مايكونش بحال بحال راه غير منطقي، أن السميك في طنجة لي يالله يخلص ليك الكرى في شي خربة تحت الدروج ديال دار عشوائية في حومة الشوك ديما حاضي من ولد مولات الدار عنداك يشفرليك البوطة، مع واحد خدام في أزيلال او تازة او كرسيف وباقي المدن لي فيها الكرى رخيص ومقتولة الحركة، من المفروض كل جهة تسير راسها وتفرض ضرائبها، وتكون ضرائب أخرى للحكومة الفيدرالية أو أي نظام آخر بحال هادشي، راه هادشي لي كاين في دول العالم الأول، وكتلقى الجهات كيتنافسوا بيناتهم على المشاريع وجلب الاستثمارات وتسهيل حياة الناس، هنا كنتسناو المركز يسالي من الرباط ويشوف لهاد الجيه شي شوية.

واحد الصديق كان موظف في إدارة السجون بما أنه جا من الأوائل في التدريب، كانت له أسبقية الاختيار في التعيين بالمدن الكبرى إلا أنه اختار أزيلال لأنها رخيصة بزاف وجامعة بني ملال قريبة ليه يمكن ليه يكمل قرايتو، بينما شي صحابو ختارو الجديدة تكرفصوا أولا مالقاوش الكرى لمدة طويلة، وحتى فاش كيلقاوه كيكون الشرط أنهم يخويو في الصيف لأن الديور كيوليو يتكراو بالنهار، عاد غلاء المعيشة وشلا مشاكيل خرى، نفس الصالير مع اختلاف المدن كيخلق فرق كبير في نمط العيش والمستقبل ديال كل واحد، راه غير منطقي نهائيا أستاذ نواحي سيدي بوعثمان القبيلة كيحتارموه ويجيبو ليه البيض والخبزز واللبن والزبدة بلدية ومرة مرة شي فروج أو غير عتوگة وساكن في الدوار، راه كيضرب واحد العشرسنين مكيديرش يدو في جيبو وشاري شي ساس في المحاميد وكيبني طبقة ويرهنها باش يبني التانية (هادي ماشي شخصية متخيلة راه كنعرفها من العائلة)، بينما بحالو يتعين في كازا إلى مكانش كيزيد السوايع ويدير هاه وهاه راه الصالير غادي يدوز بيه حياتو كاري ومايلحق معاهم حتى براكة تجيه الاستفادة ديالها من بعد، العدالة هي يكونوا الصاليرات مبدلة على حساب الجهة ويكونوا الضرائب كذلك، راه سپانيا حدانا الضرائب عندهم مبدلة حسب الجهات ومختالفة وحتى الضريبة على الدخل فيها ماهو وطني وماهو ديال الأقاليم خصوصا لي عندها حكم ذاتي، وحنا راه لهادشي غادين زعمة علاش لا مايبداش هادشي من الضرائب.