بارات وريسطو اطلنتا محيحة شعبي و"عاش الملك". مغاربة ميريكان واللي جاو من المغرب خرجو هاد لمدينة من روتينها الممل .

كود سبور اطلنطا ////

مدينة اطلنطا لا علاقة ليها بنيويورك وبوسطن اللي لعبو فيهم الاسود الماتشات اللولين ديالهم فهاد المونديال المريكاني المكسيكي الكندي. اطلنطا عندها احسن تيران تقريبا فهاد الدورة واسمو ميرسيديس. كاين وسط لمدينة. لمغاربة اللي غاديين يشوفو هاد لعشية بالتوقيت الميريكاني الماتش الاخير للاسود ضد هايتي عن المجموعة الثالثة، ما غادينش يتسخسخو. من نص النهار ديال البارح الثلاث بدات الالوان الحمرا ديال التونيات المغربية كتزين شوارع داو تاون داطلنطا. طونوبيلات وحتى كارافانات والهارلي دافينسون مزينة بالراية الحمرا.

هنا يتلاقا مغربي او مغربية بولد بلادو ضروري يسلم عليه او يردد “ديما مغرب”. الجمهور المغربي يقدر يكون قل من الجمهور اللي كان فماتش نيويورك او بوسطن ولكن خالق السعادة وناشط. تلاقات “كود” جوج مغاربة فرحانين جايين يشوفو الماتش. واحد من سان فرانسيسكو والثاني من ميامي. بجوجهم شراو التيكي من المارشي نوار ولكن شوية بكري. الثمن كان مناسب ليهم كيف قالو. مشاو تصورو مع الكورة لكبيرة اللي قريبة من التيران وكيوجدو لتشجيع الاسود اليوم.
مصدر الصورة
البارح شي بارات ريسطورات فالمدينة اكتشفات العيطة والشعبي. عدد منها دارت موسيقى مغربية شعبية ديال الحيحة والنشاط. شي بلايص بحال “ميترو” فشارع اندرو يونگ انترناسيونال ما كانش غير الشعبي كان حتى الاغاني الوطنية ورددو “عاش الملك”. كانت اجواء مغربية فمدينة كيسالي فيها لعشا فغالبية لبلايص مع التسعود ونص حتى العشرة. لمغاربة بعد ما زارو متاحف بحال ديال كوكا كولا ومركز لوتر كينك المعروف بمركز الحقوق المدنية وحديقة الحيوان ولاكواريوم الكبير ومتحف كرة القدم الامريكية، نشطو على الشعبي

الميريكاني هنا بحال مدن اخرى ولى فيه فضول يتعرف على المغربي. اللي داروه الاسود فقطر واللي بداو بيه هاد المونديال وسع قاعدة جماهيريتهم فالعالم وخاصة فهاد العالم اللي ما منوش جوج. فبار فالزنقة فمول فمتحف…. باش يعرفوك مغربي يبداو يرددو باللي عندنا منتخب واعر وباللي غادي يمشي بعيد فالمونديال.

المغربي هنا طالع ليه الجوك. عندو احترام. ايلى الاسود مشاو بعيد فهاد المونديال التسويق لبلادنا فالعالم وفهاد القارة بوحدها غادي يتزاد يكبر