خبير في الأرصاد لـ“كود”: التفاعل بين الضغط الجوي المرتافع والمنخفضات الحرارية هو سبب الصهد لّي غاتعرفو بلادنا .

أميمة عطية كود كازا ///

عرف الجو فكازا هاد الصباح داليوم الأربعاء 20 ماي، ارتفاع فدرجة الحرارة ومن المرتقب هاد الموجة توصل لعدد من المدن والمناطق، ومن المتوقع تبقا سيمانة كاملة.

وحسب بلاغ صدر البارح الثلاثاء، عن المديرية العامة للأرصاد الجوية فهاد الارتفاع فدرجات الحرارة غادي يشمل مناطق واسعة من البلاد، من بينها السهول الداخلية، السواحل الأطلسية، ومناطق غرب الأطلس، إضافة إلى سوس، الجنوب الشرقي والأقاليم الجنوبية

وفهاد السياق، ومن الناحية العلمية، وضح الخبير فالأرصاد الجوية حكيم الفيلالي، فتصريح خاص لـ“كود”، أن هاد الارتفاع فدرجات الحرارة مرتبط بدينامية جوية إقليمية معقدة، فيها تداخل ديال الضغط الجوي المرتفع مع منخفضات حرارية فالمناطق الصحراوية.

مصدر الصورة

وفسر الفيلالي سبب هاد الوضعية، وكال على أنها مرتبطة بعدة عوامل أهمها التمدد الكبير ديال الضغط الجوي لي امتد باش أغطي مجالات كبيرة وعلميا فاش كيتقوى هاد الضغط الأصوري وكتكون كتل هوائية رطبة جايا من الشمال او الشمال الغربي، وتشكل ضغط جوي منخفض للمناطق الصحراوية وهادشي كيخلي سحب الهواء اكثر سخونيا من الأقاليم الجنوبية نحو المناطق الشمالية.

وزاد الخبير فالمناخ على أن هادشي غادي يولي ممر ديال العبور للكتل الهوائية من الجنوب للشمال .

وضاف الفيلالي، أن الأجواء العليا كتعرف ارتفاع ضغط كيسميوه هوما كخبراء في المناخ بـ” قبة حرارية” في الجو لي غادي يهبط منها الهوا سخون وفاش غا يتضغط فالأرض غادي اتزاد اكتر .

وختم بأن هاد التفاعل بين الضغط المرتفع والمنخفضات الحرارية هو السبب الرئيسي فموجة الحر المرتقبة، اللي متوقع تستمر من الأربعاء حتى السبت قبل ما تبدا درجات الحرارة فالتراجع تدريجياً.