ايام قليلة بعد خرجتو العجيبة فالبرلمان وحديثو على النمذجة اللي ما فهمو حد، خرج اليوم محمد سعد برادة، وزير التربية الوطنية والتعليم الأولي والرياضة، من فاس باش يدافع على ورش إصلاح التعليم فالمغرب.

الوزير قال باللي كيمشي فالاتجاه الصحيح، خصوصاً بعد النتائج اللي حققاتها “مدارس الريادة”، واللي وصفها بأنها نتائج غير مسبوقة سواء على مستوى التعلمات أو تقليص الهدر المدرسي.

وخلال لقاء نظماتو شبكة الأساتذة الجامعيين والهيئة الوطنية لأطر التربية والتكوين التجمعيين بمدينة فاس، اليوم السبت، ضمن محطة “مسار المستقبل”، قال برادة بلي المدرسة العمومية خاصها تبقى بعيدة على المزايدات السياسية، لأن مستقبل التلاميذ ما خاصوش يدخل فالصراعات الضيقة أو الحسابات الانتخابية.

وبرادة تفاعل حتى مع الجدل اللي دار على كلمة “النمذجة” اللي استعملها فالبرلمان، ووضح أن المقصود بها هو “la modélisation” بالفرنسية، يعني تبسيط الشرح للتلميذ فبداية الدرس باش يفهم الطريقة الصحيحة لإنجاز العمليات الحسابية. وأضاف أن الوزارة دابا ولات كتستعمل وسائل رقمية وبصرية حديثة، من بينها 9 فيديوهات قصيرة يومياً كتتعرض داخل الأقسام، باش التعليم يخرج من الطرق التقليدية ويولي أكثر تفاعلاً وقرباً من التلميذ.

وانتقد الوزير محاولات التشويش على الإصلاحات اللي كيعرفها القطاع، معتبراً أن بعض الأطراف كتستغل التعليم سياسياً عوض دعم الدينامية اللي بدات كتبان نتائجها على أرض الواقع. وأكد أن الثقة فالمدرسة المغربية بدات ترجع تدريجياً، خصوصاً مع الاهتمام اللي ولا كيبينوه خبراء دوليون من إفريقيا وأمريكا وبريطانيا بالتجربة المغربية.

وكشف برادة أن مشروع “مدارس الريادة” بدا بـ600 مدرسة ابتدائية، وغادي يوصل لـ6600 مدرسة خلال الدخول المدرسي المقبل، بعدما حقق أثراً بيداغوجياً وصفو خبراء دوليون بأنه الأعلى عالمياً بنسبة نجاح بلغت 0.9.

كما أوضح أن إعداديات الريادة نجحات فتقليص الهدر المدرسي بـ50 فالمائة، بفضل الأنشطة الرياضية والموازية وخلايا اليقظة، بالتوازي مع توسيع مدارس الفرصة الثانية وتعميم التعليم الأولي اللي تجاوز دابا 80 فالمائة، عبر فتح أكثر من 50 ألف قسم.

وعلى مستوى البنيات التحتية، شدد الوزير على أن الوزارة خدامة باش تنهي مشكل الاكتظاظ ابتداءً من الموسم المقبل، مع تحديد سقف 36 تلميذ فالأقسام الابتدائية والتأهيلية و40 تلميذ فالإعدادي. كما أكد أن 70 فالمائة من المؤسسات التعليمية تم ترميمها وتأهيلها، وأن النسبة المتبقية غادي تكمل خلال هاد العام والعام الجاي، داعياً المغاربة ما ينساقوش وراء الصور والإشاعات اللي كتروج لفشل الإصلاح اعتماداً على مؤسسات مغلقة أو معطيات مغلوطة.