سعد المجرّد ماشي "ولدنا" ولد مّو و بّاه، و لي كايعتابر المجرّد ولدو يديه عندو للدار و يفرش ليه حدا مرتو و بناتو و كل التضامن مع الضحايا و العقبة لينا فالمغرب فاش يولي القانون و المجتمع فصف الضحايا و كايوفر ليهم الدعم الكامل و مانبقاوش نسمعو ديك الجملة الحقيرة ديال " هي لي مشات معاه" .

مصدر الصورة

سهام البارودي – كود//

القضاء الفرنسي ضرب سعد المجرد بخمس سنين د الحبس و تعويض ديال ثلاتين مليون للضحية و خمسة د المليون أتعاب المحامي ديالها، و هادي طبعا غا وحدة من المحاكمات لي مجرجر فيها المجرد ابتداءا من ميريكان مرورا بالمحاكمة الشهيرة لي عندو مع لورا بريول و انتهاءا بهاد المحاكمة ديال سان تروبي … و هادشي غا لي عرفنا طبعا و لي فخبار وسائل الاعلام…

واش گاع هاد الضحايا كايكذبو و كايطيحو الباطل و مسيفطينهم ليه باش يوقفو ليه لاكاريير ديالو ؟ آه، كاينين ناس ف2026 متيقين هاد الهضرة و كاينين لي واخا يبان المهدي المنتظر بجلالة قدره و يقوليهم بلي سعد المجرد مذنب غايكذبو المهدي المنتظر و يتيقو بالمجرّد.

و لكن هادشي عادي من ناس كبرو فمجتمع كايعتابر المرا “ثقبة”، ثقبة تخلقات باش تلبّي الرغبات و النزوات ديال بوخصية، فما بالك فاش كايكون بوخصية مشهور و بوگوص و عندو ليفان بالأولوفات، ديك الساعة راه كانوليو كاملين بينا گاع العيالات د العالم ديالو، و شكون بغات تكون هادي لي تقول للمجرّد لاّ ! مابغيتكش ! ماتقربش ليا ! آويلي هادشي راه شي وحدين كايجيهم مايمكنش ! مستحيل ! مستحيل شي وحدة تقول للمجرّد لاّ ! و أي وحدة تاهماتو بالاغتصاب راها غا كذابة، بروفيتوز، تبرعات معاه و بغات دير ليه مصيدة باش تنصب عليه مسكين !

هادو نيت هوما لي فاش كايهضرو على المجرد كايعيطو ليه “ولدنا”، “ولد بلادنا”، انا واخا يكون المجرد ولدي، نكرو و نقطع ورقتو من الحالة المدنية حيت توسامبلومون ماكايشرفنيش يكون ولدي مغتصب كايموت على الزك المرعود، و لي كايعتابر المجرد ولدو يديه عندو للدار و يفرش ليه حدا مرتو و بنتو و خواتاتو، أما ديك القضية ديال “ولد بلادنا” انا شخصيا كانعتارف بجوج د الحوايج ولد الناس وولد الحباب، اما ديك القضية ديال غا حيت ولد بلادي مشاركين انا وياه فنفس لاكارط ناسيونال فراه ماشي سبب كافي يخليني ندافع على مغتصب و نتعاطف معاه. لا تعاطف مع المغتصبين و المجرمين و الحگارة، و كل التضامن مع ضحايا المجرّد !

و بيبا القضاء الفرنسي النزيه الذي لا يخشى في الله لومة لائم و العقبة للمغرب و المغربيات فاش يولي القانون و المجتمع كايوقفو مع الضحايا و كايوفرو ليهم الدعم و التضامن و النزاهة، راه شحال من مغربية ضحية د الاغتصاب ساكتة و ضاربة الطم على جريمة قدها قداش غا باش ماتخسرش الخاطر لواليديها و باها و خوتها و عائلتها حيت عارفة لا خرجات و بغات تاخد حقها غاتسمع شي هضرة فحال ” هي لي بغات” و “مايديرهاش” و “يتمنعن و هن راغبات”