شوكي رد على نزار بركة: الدولة اختارت السوق الحر وميمكنش نديرو سياسات بائدة فشلات فالماضي .

مصدر الصورة

كود فاس ///

فخرجة سياسية واضحة من فاس، محمد شوكي رئيس حزب التجمع الوطني للأحرار، خرج يرد على بعض الطروحات اللي ولات كتروج فالنقاش السياسي بخصوص الأسعار والتجارة والتوزيع، خصوصاً بعد التصريحات الأخيرة ديال نزار بركة. شوكي، اللي كان كيهضر فلقاء نظماتو شبكة الأساتذة الجامعيين والهيئة الوطنية لأطر التربية والتكوين التجمعيين ضمن محطة “مسار المستقبل”، أكد باللي المغرب من شحال هادي اختار نهج الاقتصاد الحر والمنافسة المفتوحة، وميمكنش اليوم نرجعو لسياسات قديمة فشلات وماعطات حتى نتيجة.

وقال شوكي بالحرف أن الدولة خاصها تلعب دورها فتنظيم السوق وتقوية المنافسة الشفافة، ماشي ترجع لأساليب قديمة ديال التدخل المباشر اللي سبق وتجربات كثيرة بينات محدوديتها. وزاد موضحاً: “ما نزايدوش على بعضياتنا بسياسات من الزمن البائد فالتجارة والتوزيع”، قبل ما يستحضر تجارب مؤسسات بحال “أو سي إي” و”صوديا” و”سوجيطا”، اللي اعتبرها اليوم كتقدم دروس واضحة على فشل بعض المقاربات القديمة فالتدبير الاقتصادي.

رئيس الأحرار ما خلاش الفرصة تفوت باش ينتاقد كذلك الخطاب اللي وصفو بالغوغائي والشعبوي، واللي كيبغي يقدم حلول سهلة لمشاكل معقدة. وأكد باللي الحكومة الحالية اختارت تخدم بمنطق الإصلاح الواقعي، بعيد على الشعارات الفارغة والسجالات السياسية العقيمة، مضيفاً أن الإصلاحات اللي دارتها الحكومة سواء فالحماية الاجتماعية أو الاستثمار أو دعم الاقتصاد الوطني، كلها جاية ضمن رؤية واضحة كتوازن بين الحرية الاقتصادية وحماية القدرة الشرائية للمواطنين، بلا رجوع لسياسات عفا عليها الزمن