قرر الناخب الوطني المغربي محمد وهبي، يعيط على منير المحمدي الگول ديال نهضة بركان، للمشاركة فكاس العالم 2026، واخا يالاه رجع يحبس لفرقتو غير الماتش اللي فات، بعدما دار عملية جراحية مباشرة بعد نهاية كأس افريقيا 2025، فيناير اللي فات، وقرار وهبي من المنتظر يخلق جدل كبير وسط الرأي العام الرياضي المغربي، خصوصا وان كاينين گوال عندهم تنافسية، وطامعين باش يكونو احتياطيين لياسين بونو الگول الاول فالمنتخب.

وفحوار له مع قناة الرياضية، قال محمد وهبي: “منير المحمدي لعب ماتش والحالة ديالو مزيانة، وبين انه واجد دهنيا وهذا الشي مهم بزا، ملي كايكون عندك دوزيام گول، خاصو يكون ديما واجد باش يلعب فأي وقت، وبين هذا الشي فكاس العالم اللي فاتت ضد بلجيكا واخا ما لعبش بزاف ديال الدقايق فكاس العالم 2022، ونفس الشي دابا غادي يلعب شي ماتشات باش يرجع الريتم شويا بشويا”.

ووضح وهبي كثر بخصوص المحمدي: “لاحظنا من دابا انه بحالة مزيانة، وخدم بجدية كبيرة وهو لاعب محترف، وخدم مزيان باش يرجع للنيفو ديالو، وكمل التدريبات بشكل منتظم، وهذا الشي خلاه واجد باش يرجع دغيا، ودابا ما بقاش كايحس بش آلام، ومن ورا غير سيمانا واحدة ولى واحد باش يلعب ماتش”.

وكمل وهبي: “لگوال معروفين دغيا كايرجعو للنيفو ديالهم، وهذا الشي عندو علاقة حتى بالثقة بالنفس، وهو عندو ثقة كبيرة فراسو زائد الخبرة الكبيرة ديالو، ومينر غادي يكون واجد، وانا معول عليه حيث من غير الإمكانيات ديالو فالتيران، هو عنصر مهم بزاف للگروب”.

قرار وهبي باستدعاء المحمدي لكاس العالم 2026، غادي يخلق جدل كبير، خصوصا وان گوال بحال رضا التگناوتي د ليفار واللي داير موسم واعر مع فرقتو ووصل فيه لفينال دوري ابطال افريقيا ومتصد البطولة، ومهدي لحرار د الرجاء الرياضي وشيهاب د المغرب الفاسي ومهدي بنعبيد د الوداد الرياضي متنافسين وكايلعبو ومقديمن مستويات مزيانة، ومنير المحمدي يالاه راجع بعد راحة طويلة بسبب الاصابة وزائد عامل السن حيث عندو 37 عام، وراه هذا الجدل كان حتى فوقت الناخب الوطني السابق وليد الركراكي، مع المحمدي ولاعبين اخرين اللي ديما كانت الجاهزية والسن ديالهم خالقين جدل كبير.