المحامين صعّدوها: النقباء الـ17 غاديين للاستقالة ورفضو يشرفو على أي انتخابات بسبب خلافهم مع وهبي .

منذ

عمر المزين – كود////

علن مكتب جمعية هيئات المحامين بالمغرب، فخطوة تصعيدية مسبقتش دار بحالها، باللي النقباء الـ17 غاديين يعقدو جموع عامة استثنائية باش يقدمو الاستقالة ديالهم، احتجاجاً على اللي وصفوه بـ”الوضع غير المسؤول والمناورات المغرضة”، وكذا بسبب “المساس المستمر بثوابت المهنة والمؤسسات الرمزية ديالها من طرف وزير العدل”.

وجا فبلاغ خرج من بعد اجتماع طارئ سالى فالليل، أن النقباء قررو حتى ما يبقاوش يشرفو على تنظيم أي انتخابات مهنية، لا دابا لا مستقبلاً، فإشارة للتوتر الكبير بين وزارة العدل وهيئات المحامين بسبب مشروع القانون رقم 66.23 المتعلق بتنظيم مهنة المحاماة.

وأكد البلاغ، الل توصلات بيه “كود”، أن مكتب الجمعية قرر يخلي اجتماعه مفتوح، معتبراً أن الجسم المهني داخل فـ”معركة نضالية وجودية” وما كاين حتى تراجع على المهمة اللي عطاهالو الجسم المهني، كرد على المسار اللي خداه مشروع القانون داخل البرلمان.

وانتقدات الجمعية اللي قالت عليه “عدم التزام وزير العدل بالتعديلات اللي تقدمات بها الأغلبية”، رغم التوافقات السابقة اللي دازت، حسب البلاغ، باسم الأغلبية الحكومية وبرعاية رئيس الحكومة.

وسجلات الجمعية حتى اللي وصفاتو بـ”توجه وزير العدل لتقديم تعديلات شفوية” ضد المنهجية المعروفة، معتبرة أن هاد التعديلات كتمس باستقلالية المهنة والحصانة ديالها، مع رفض تعديلات أخرى تقدمات بها فرق برلمانية من الأغلبية والمعارضة كانت، حسب الجمعية، كتهدف لتعزيز استقلالية المهنة وحصانتها.