فينكم يا المنتخبين ديال الجمعات القروية؟.. شاهد لـ“كود”: ترونسبور المدرسة نواحي برشيد رابط الفران بقنبا وهاز كثر من جهدو.. وشيفور كيسوك بالزربا وولدو كيراقب ولاد الناس بلا مرافقة خاصة بالتلاميذ .

مصدر الصورة

أميمة عطية – كود كازا ///

عرفات منطقة السوالم الطريفية نواحي برشيد، صباح الجمعة 15 ماي، كسيدة سير خطيرة بعدما تسطحات حافلة للنقل المدرسي بحيط ديال واحد الجنان فطريق دوار الكروشيين، وهي الحادثة اللي خلفات إصابة 7 تلاميذ بجروح خفيفة، فيما تنقل حوالي 32 تلميذ حسب ما تنشر ف” كود” ، و لاسعاف جات باش اديرو الفحوصات الطبية وداوهم سبيطار .

هاد الحادث ماشي غير “كسيدة عابرة”، ولكن نتيجة مباشرة للإهمال اللي كتعرفو عدد من جماعات العالم القروي فملف النقل المدرسي، وسط غياب المراقبة والتساهل مع حافلات متهالكة كتغامر يومياً بحياة التلاميذ، والمنتخبين ديال لجماعات ساكتين.

شاهد على لكسيدة كال ل ” كود” إن هاد ترونسبور ديال لمدرسة كان هاز عدد كبير من التلاميذ، في ظروف مازالت كتطرح تساؤلات على السلامة ديالها، خصوصا أن لمصدر أكد ان هاد ترونسبور فيه لفران مربوط بقنبا وأنه شيفور معاه ولدو كيحضي دراري بلمسويطة بلا مرافقة او معلمة ، وانه كيمشي بسرعة ولحافلة محسوبة على شي جمعية محلية.

وزاد ضاف نفس هاد لمصدر وكال أن ترونسبور حالتو متهالكة وانه قديم ومكيتوفرش على شروط سلامة وهو ما زاد يطرح نقاش على مراقبة لمنتخبين ديال هاد لجماعات والتجهيزات ديال النقل المدرسي فهاد المناطق القروية.

ومن جهتهم، عبرو أولياء الأمور على سخطهم وغضبهم في تصريحات إعلامية ، واكدو على ان هاد لكسايد ديما كيوقعو حيت طريق خايبا ، وحيت ترونسبور كيهز كتر من لقدرة ديالو ومافيهش مرافقة ووجهو تساؤلات للمنتخبين فالجماعة حول دورهم فمراقبة النقل المدرسي، مطالبين بتدخل عاجل لتحسين السلامة وحماية التلاميذ اللي كيعتمدو على هاد الوسيلة يوميا.