بنسعيد كيحارب الكفاءات فالبام ومهلي فتافهين أمثال عبقري.. بعدما دار حصار على عمر الخياري للي بان قافز فالكان: استقالات جماعية فإقليم تازة .

مصدر الصورة

كود الرباط//

نايضة استقالات ف البام باقليم تازة، والسبب حسب مصادر “كود” هي طريقة تدبير التزكيات للانتخابات المقبلة. الكفاءات الشابة والجيل الجديد معندوش بلاصة فهاد الحزب بإقليم تازة، خصوصا من نهار دارو ديناصورات “الانتخابات” والأعيان يد مع بعض المشتبه بهم باش يطيحو الشاب عمر خياري، للي جا يخدم المنطقة وينقذ الفرقة ديالها من الإفلاس المالي والرياضي.

معطيات توصلت بها “كود” تفيد، بلي صحاب المهدي بنسعيد، عضو القيادة الجماعية، دايرين العصا فالرويضة لأي وجه جديد كيبان عندو حظوظ ينافسهم سياسيا ورياضيا ف المكانة الاعتبارية داخل المجتمع وف الأوساط السياسية.

لذلك صحاب بنسعيد، وفق مصادر “كود”، حاربو بشراسة وجود عمر خياري ف تازة، ودارو ليه العصا فالرويضة حتى ف فرقة قدس تازة باش يطيحوه، وحاربو كبار المنتخبين لي شادين ف بزولة الصفقات ديال الجماعة للي أصلا كلها فساد ورئيسها السابق متابع فملفات فساد.

وكيعيش حزب الأصالة والمعاصرة بإقليم تازة، ف أزمة تنظيمية كبيرة قبل انتخابات 2026، خصوصا بعدم قدم عدد من أعضاء ونشطاء البام فهاد الإقليم استقالات جماعية داخل هياكله.

بنعسيد مباغيش شباب عندو رؤية خاصة به وكيناقش ويطرح تصورات جديدة، خصو الاتباع والتافهين واللي كيدير بهم طريق ف الصفقات بحال رئيس شبيبة البام صلاح الدين عبقري وللي هو نيت كاتب عام وزارة الثقافة.

وقدم خمسة أعضاء بارزين استقالاتهم النهائية من الحزب بينما قرر عضو سادس تجميد عضويته في خطوة احتجاجية احتجاجاً على ما وصفوه بسوء التدبير وغياب الشفافية في تدبير ملف التزكيات الخاصة بالاستحقاقات المقبلة.