هادوك الجماهير ماشي سايبين أو عنيفين راه غير لقاو الدولة حنينة ومتراخية والقوانين متساهلة وقديمة وتطبيقها صعيب، أما ماغاديش يكونوا اعنف من الهوليكانز د النكليز لي تردعوا دغية وغير بالقانون .

مصدر الصورة

محمد سقراط-كود///

أوروبا بدا فيها بناء الانسان خمسمية عام هادي، وأصلا كان مبني من قبل أيام الامبراطورية الرومانية غير دارو خطأ عتانقوا دين شرق أوسطي المسيحية، وهوما يغرقوا في الظلمات، ونهار ثاروا عليه راه خرجوا للنور وأعادوا بناء الإنسان، ومع ذلك راه هي بلاد الهوليگنز بأنواعهم وعنف الجماهير والأولترات بانوا فيها أصلا، راه بناء الانسان ولا الحيوان أو العمران معندو علاقة بتهرگاويت والنزعة للإجرام، راه الدولة مخلية فراغ خطير لهرگاوة يديرو مابغاو، البوليس القليل ومعندوش الصلاحيات الكافية لمحاربة الجريمة، جوج مجرمين باغين يقتلوا بعضياتهم, البوليسي مخاصوش يدخل وسط منهم يفك، راه كيغامر بحياتو وحتى التجهيزات أي كانت عندو بدائية.

محاربة شغب الجماهير ماشي شي علم غابر أو حل لشي معادلة مستحيلة، راه كان في دول كثيرة وحاربوه بالقوانين والاحكام الصارمة وبالتكنولوجيا وبتحسين تجربة مشاهدة الماتشات، وتكفي تجربة محاربة الهوليكانز في النكليز من طرف ماركاريت تاتشر، أول حاجة خاص يتنظم الولوج للملعب وثمن التذكرة، نتا مبلي بكورة كتبغي فرقتك خاص تكون عندك بطاقة اشتراك سنوي وفيها گاع المعلوات ديالك، في الدوري الألماني اغلب الفرق عندهم هاد البطاقات مبيوعين كاملين من اللول دالعام، مكاينش حني راسك وسير شري تيكي بتلاتين درهم وطلع للتيران عربط فيه، كرة القدم راه من اهم المنتوجات الترفيهية فهاد العصر وفيها الفلوس، لذا خاص ثمن التيكي يطلع باش يدخل لي باغي يتفرج بصح، ماشي لي باغي يخرب ويضرب ويقتل.

الناس كيبقاو يسبوا في هاد الجيل وأنه ناقص عصى وتربية، ولكن راه واليدين هاد الجيل هوما هرگاوة أي كيحطو طوموبيلاتهم فوق الطروطوار، ويدوزو في الضو حمر ويصوگو صوگان ديال الكانيبال، ويلوحوا الزبل في أي بلاصة ومايشدوش الصف، وشبعانين فساد وتهرگاويت، والجيل لي قبل منهم هكاك، حقا الدولة فرطات وتهاونات في هاد القضية وضيعات علينا عشرات السنوات مشات في تاهركاويت، الانسان الأوروبي أو الاسياوي الشمالي معندوش جين راقي، وانما القوانين وتطبيقها لي كيردوه راقي، وهادشي لي مكاينش في المغرب، نظام الغرامات عندنا شبه عاجز سواء على الاستخلاص او حتى تغريم المخالفين، هادوك الجماهير ماشي سايبين أو عنيفين راه غير لقاو الدولة حنينة ومتراخية والقوانين متساهلة وقديمة وتطبيقها صعيب، أما ماغاديش يكونوا اعنف من الهوليكانز لي تردعوا دغية وغير بالقانون، ومع ذلك كتوقع احداث عنيفة ديما راه كاملين شفنا الحرب لي وقعات بين الجماهير في كأس أوروبا في فرنسا، ولكن كيبقى داكشي نادر، حنا راه رجع عندنا هو السلوك الطبيعي.