السيديتي حيحات فبني ملال وهادي هي أهم مطالبها ففاتح ماي 2026 .

منذ

كود – بني ملال //

نقابة CDT دارت اليوم فاتح مايو 2026 مسيرة كرنفالية رفعات فيها شعارات كتندد بتكرفيص الوضع الاجتماعي وارتفاع الأسعار، كيف ما عبرات النقابة على الغضب ديالها من الغلا وتكاليف المعيشة اللي ولات صعيبة على المواطنين، المسيرة شاركو فيها عمال من قطاعات مختلفة بحال الفلاحة، التعليم، الصحة، الجماعات، الفوسفاط، الأبناك، مقالع، و عمال النظافة والحراسة .

مصدر الصورة

فالمهرجان الخطابي، النقابة هضرات على الوضع العام فالمغرب، وقالت بلي كاين ارتفاع فالتضخم والبطالة وزيادة الهشاشة، وفوارق اجتماعية ومجالية كتكبر، وكاين تحميل للطبقة الشغيلة كلفة الأزمات.

النقابة دعات للانخراط فبرنامج نضالي جديد واللي من بينو وقفة احتجاجية فبني ملال نهار 17 ماي، واعتبرت أن فاتح ماي خاصو يكون محطة باش يعبرو العمال على مطالبهم ويدافعو على حقوقهم.

مصدر الصورة

ومن أهم المطالب اللي رفعاتها النقابة اليوم ، الزيادة فالأجور والتقاعد ، مراجعة الضريبة على الدخل، ربط الأجور بالأسعار، احترام الحريات النقابية، ومحاربة التضييق على العمل النقابي.

وزادو طالبو حتى بتحسين شروط الخدمة، محاربة الخدمة فالنوار، تسجيل العمال فالضمان الاجتماعي، ودعم حقوق المرأة الخدامة، و المصادقة على اتفاقيات دولية كتهم محاربة العنف فالخدمة.

وختمات CDT بدعوة لحوار اجتماعي حقيقي ، وتحقيق العدالة الاجتماعية، وخلق فرص الشغل، وتحسين الخدمات العمومية، ومحاربة الفساد والمضاربات، وحماية القدرة الشرائية مع هاد الغلا لي كاين.