تزاد موحى وسعيد الويراري فقبيلة آيت ورا بالأطلس المتوسط، وكان واحد من المقاومين لي لعبو دور كبير فالمقاومة ضد الاستعمار الفرنسي ما بين 1908 و1924، خصوصاً فالمنطقة ما بين القصيبة وسهول الشاوية.

موحى واسعيد لي تسمات عليه الزنقة الشهيرة لي تهدمات مؤخرا في المدينة القديمة ديال كازا فإطار مشروع ”المحج الملكي“ تكنات عليه حتى مدينتو القصيبة لي خرج منها، موحى واسعيد حسب لي عاصروه كان إنسان متواضع ومقبول، وفنفس الوقت كان ذكي بزاف واستراتيجي فالحرب وعندو طريقة ديبلوماسية فالتواصل مع القبائل، داكشي علاش اختاروه الناس ديال آيت ويرا يكون “أمغار” (زعيم)، وقدر يجمع القبائل تحت يدو.

موحى واسعيد شارك حتى فحملات عسكرية مع المخزن، ومن بينها حملة ضد آيت سخمان وقدر يجمع الجيش المخزني مني تشتت فين قدر يزططهوم، وهادشي خلا السلطان يعطيه قيمة كبيرة، وعينو قايد على اتحادية آيت السري فـ1888، وعطاه جيش فيه 5000 جندي مع المدافع.

على المستوى الوطني موحى واسعيد عاون السلطان مولاي عبد العزيز فمحاربة الثورات، خصوصاً ديال بوحمارة لي لعب فيها دور كبير، فـ1907 ملي بداو الفرنسيس كيقربو للمغرب، موحى وسعيد متافقش مع السلطان عبد العزيز، حيث كان متساهل مع الفرنسيين، ووقف مع السلطان مولاي عبد الحفيظ لي دعا للجهاد.

موحى واسعيد مشا حتى لمراكش، وتلاقى مع السلطان، وحركْ معاه حتى لفاس، ومني ضربات السفينة الفرنسية كازا فـ5 غشت 1907، تجمعو عليه المجاهدين فالأطلس المتوسط ومشى بهم لمديونة فـ1908 باش يوقف التوسع ديال الفرنسيس، تما فين دار معارك وحْركات ناجحة بحال ديال سيدي مومن وتادارت، فين ربح الفرنسيين وقدر يحاصرهم وسط سور المدينة لمدة 6 شهور.

من ديك الساعة موحى واسعيد ولى كيقود المعارك ما بين القصيبة والشاوية، وكان كيدير هجمات مفاجئة (كوماندو) على المراكز العسكرية الفرنسية فمناطق بحال وادي زم وتادلة.

موحى واسعيد واجه كبار الجنرالات الفرنسيين وربحهم فمعارك بحال سيدي بن داوود ومرمان، هاد الهزائم خلات فرنسا توقف التوسع وتفكر تفاوض معاه باش يجيبوه لصفهم، وعرضو عليه يبقى قايد وياخذ الفلوس كتيرة، ولكن رفض وكمل المقاومة حتى تقادا ليه الأجل فـ1924، واليوم راه القبر ديال موحى واسعيد مهدد بالغرق لحقاش جا وسط أشغال بناء سد تاكزيرت .