المسرح الملكي او كيفاش سيدنا كيبغي الثقافة ودابا خاص الفاعل الثقافي يخدم ويفهم الميساج . راه اول مسرح ملكي فتاريخنا المعاصر واكبر معلمة ثقافية دارت بعد مسرح محمد الخامس فالستينات وبعد هدم مسرح الدار البيضاء .

مصدر الصورة

كود هناء ابو علي ///

ممكن تجيك غريبة هاد العودة مرة اخرى للتدشين الاميري الرائع للمسرح الملكي بين سلا والرباط اللي دشن رسميا لاربعا 22 ابريل 2026. لكن فهاد التدشين وبلا ديك لكلام الانشائي اللي كيقولوه شي مسؤولين على مشاريع ملكية، نشوفو الواقع. راه تدشين تاريخي فالشأن الثقافي والفني بالمغرب. راه بصاح كاين مغرب ثقافي فني بعد 22 ابريل 2026 وقبلها.

دابا هادا اهم مسرح دارو المغرب من نهار خدينا الاستقلال. فبداية الستينات كان دشن الملك الحسن الثاني “المسرح الوطني محمد الخامس” بالرباط. بعد سنوات غادية تكون حداه المعهد العالي للتمثيل والتنشيط الثقافي. ولكن التدشين فالستينات لهاد المسرح ما كانش وراه تفكير او سياسة ثقافية واضحة. ديك الساعة اصلا ما كانتش وزارة الثقافة. الارض ديال المسرح كانت ديال الاوقاف وحتى اواخر الستينات وبالضبط يوليوز 2068 عاد غادي يتسمى محمد الفاسي اول وزير للثقافة وخلطوه مع التعليم العتيق وسماه التدريس التقليدي. كان حدث يكون للثقافة وزير ولكن الرؤية تقليدية محافظة.

فعهد الراحل كان حدث صادم لاصحاب المسرح فكازا هو باش هدم وزير الداخلية ادريس البصري المسرح البلدي فالثمانينات. ديك الساعة تقتل نوع من المسرح وتدفع بمسرح اخر كان كيدار فمسرح محمد الخامس.

الثقافة ما كانتش هاجس قبل. باش جا سيدنا للحكم ف1999 بدات تنمية ثقافية دينامية فنية ماشي غير جديدة ولكن دارت قطيعة مع السابق. شفنا مهرجانات فنية موضوعاتية وعامة. ها الصويرة بكناوة والرباط قبل ما يوصل لموازين وفاس بموسيقاها الروحية قبل ما تزاد الصوفية ومراكش باحتفاءها فالفن السابع من خلال مهرجان مراكش الدولي للفيلم.

سيدنا حرر الطاقات. خلى مغاربة يبدعو. خرجات اشكال فنية كانت مخبية خاصة فيما كان يسمى قبل سنوات بالموجة الجديدة فالموسيقى =راب وفيزيون”…” شفنا مغرب اخر. شفنا فثقافة ما كانش مسموح ليها تبان. شفنا طاقة مبدعة خلاقة فالصورة والصوت واللون من خلال جيل مبدع من التشكيليين والتشكيليات….

افتتاح المسرح الملكي نهار لاربعا اللي فاتت من قبل الاميرات لالة خديجة ولالة مريم ولالة حسنا راه غير تأكيد لهاد الاهتمام الملكي. سيدنا ديما كيطراسي وخاص اللي يتبعو. فقطاعات كاين اللي قدر وكاين اللي ما فهمش هاد الرؤية.

سيدنا كلف اختو لالة حسنا برئاسة مؤسسة المسرح الملكي. بغى يحمي هاد المعلمة من اللعب اللي يقدرو يديروه سواء السياسيين او الفنانة او المنتخبين او السلطات المحلية. بغى يخليه مؤسسة للجميع. مؤسسة للابداع.

راه حضور الاميرات الثلاث تأكيد على هاد الدينامية.

فهاد الحفل كانت حاجة مهمة بزاف وهو الاصرار على دعوة الفنان المغربي فتعددو. المسرحي الراقص السينمائي المغني وحتى فهادا كاين الشعبي والعربي والكلاسيكي ووو …… نساء ورجال. كلهم جاو وبركو وسط المسرح. فالبلاصة اللولى. باقي الحضور سواء فليلوج او فالجنب بحال ايلى كيتفرجو فيهم. هادي راها رسالة واضحة من سيدنا. انتوما الفنانة ديالكم هاد المسرح الملكي. كلها وفمجال ابداعو، نوضو تخدمو وتبدعو وتنتجو ابداع مغربي للمغاربة وقادر ينقل صورة بلادنا ويسافر للعالمية.

طبعا المستحيل ماشي مغربي، وقادرين فنانات وفنانين يبدعو اوبيريت على مئات القصص المغربية. على الحب كي على الوطن. بابداع وبلا تقريرية.
دابا المسؤولية على الفاعل الثقافي والفني. على المبدع. طبعا خاصو ظروف مواتية للابداع، باش يدير خدمتو. باش يكون فمستوى مشاريع بحال المسرح الملكي فالرباط ونتمناو تدشين مسرح الدار البيضاء الجميل حتى هو هاد العام اللي داخل فهاد الدينامية اللي طلقها سيدنا من نهار وصل للحكم.