مسؤول نقابي لـ’’كود‘‘ على مقتل شيفور  طاكسي فكازا: الواقعة كتبين غياب السلامة فالقطاع والمهم دابا هو يتشدو المجرمين ويتعاقبو ماشي لقاو الطاكسي "1604"صافي.. .

أميمة عطية كود كازا ///

عرفات كازا لبارح الأحد جريمة هزات الرأي العام، من بعد ما لقاو شيفور طاكسي مقتول فسيدي مسعود بعين الشق، وخلات الواقعة صدمة كبيرة عند البيضاويين ومهنيي القطاع.

وفتصريح خاص لـ“كود”، وضح رئيس الاتحاد النقابي للنقل الطرقي المنضوي تحت لواء الاتحاد المغربي للشغل، والكاتب الوطني، الصديق بوجعرة، بلي هاد الواقعة ماشي معزولة، ولكنها كتعكس الوضع الخطير اللي ولى كيتخبط فيه القطاع، خصوصا مع الاعتداءات الكثيرة على الشوافرية ديال طاكسيات.

وكال بلي بزاف ديال المهنيين كيديرو خدمتهم تحت الضغط والخوف، بلا وسائل حماية كافية، وزاد أكد بلي خاص الحق ديال مول الطاكسي لي تقتل اتخاد حيت هاد الجريمة بشعة وغير مقبولة، وصدمات الجميع.

ومن جهة أخرى، صدر الاتحاد النقابي بلاغ كتوفر “كود” على نسخة منو، باش يعزز هاد الموقف، استنكر فيه بشدة هاد الجريمة، واعتبرها نتيجة مباشرة لغياب شروط السلامة والتجاهل للمطالب ديال المهنيين، وطالب بفتح تحقيق عاجل وتوقيف المتورطين، مع اتخاذ إجراءات عملية بحال تركيب الكاميرات داخل الطاكسيات واعتماد نظام تتبعGPS لتسريع التدخل فحالات الخطر.

وفالتطورات الآخرة، وحسب معطيات أولية توصلات بها “كود”، وأكدها لنا لمتحدت، البوليس لقاو هاذ الصباح الطاكسي ليدار رعب في بيضاويين ولتقتل فيه مول طاكسي من نوع ” داسيا صنديرو” 1604، وزاد كال بلي بالنسبة له ماشي هادا هو لمهم القاوه او لا، خاصهم المجرمين يتشدو ويتعاقبو اشد عقاب.

وفهاد الإطار، العناصر الأمنية مازال كيقلبو على لي تعداو على شيفور فجريمة زعزعت الواقع وسوشيل ميديا والبحث مازال متواصل.

مصدر الصورة