أزمة "بروفايل" رئيس حكومة 2026: واش "تسريبات جبروت" قطعات الطريق على شوكي والمنصوري وفتحات الباب لبركة لرئاسة الحكومة؟ .

مصدر الصورة

كود الرباط//

ضربة مور ضربة، الأغلبية الحكومية دازت عليها دكاكة هاد السيمانا، تزامنا مع تقديم الحصيلة الحكومية فالبرلمان، خرجو تسريبات وتحقيقات على جوج زعماء فهاد الاغلبية. محمد شوكي رئيس الأحرار، لي خرجات عليه صفحة جبروت وثائق على القروض عن الطريق لنفس العقار واللي وصلت 3 مليون دولار.

أما فاطمة الزهراء المنصوري، المنسقة الوطنية لحزب الأصالة والمعاصرة، خرج عليها تسريبات كذلك من نفس الصفحة المثيرة للجدل “جبروت”، للي هضرات على من 80 معاملة عقارية مرتبطة بها وبأفراد من عائلتها، وشبهات تحويل اراضي فلاحية الى حضرية وغيرها. وهنا لا بد من الإشارة سبق ليها نفات عبر “كود” هاد المعطيات للي تروجو عليها واعتبرتها استهداف ليها وبلي “كرشها مافيها عجينة”.

وفالمقابل ديال هاد تسريبات، كيعيشن الأمين العام لحزب الاستقلال، نزار بركة، أفضل ايامو، وكيقدم أوراق اعتماده كخيار “رجل الدولة” القادر على تدبير المرحلة القادمة بتوازن وهدوء.

ف نهاية هاد الاسبوع للي كان عامر تسريبات وتحقيقات صحفية (تحقيق موقع برلمان.كم)، اختار نزار بركة، وزير التجهيز والماء، الظهور في لقاء تواصلي بالرباط، وبان هادئ وفرحان خصوصا مع الاستقطابات الجديدة لي دار، وحسمه لتزكية عدد من الأسماء بدعم وحضور الرجل القوي في الحزب محمد ولد الرشيد.

بركة فهاد اللقاء تسلح بنسبة ملء حقينة السدود، وحصيلة البنيات التحتية والتجهيزات العمومية ف عهده. .

ولكن أكثر ملف كيعاود يذكر به بركة فجميع لقاءاتو الأخيرة هو ملف الصحراء، بتأكيده على أن حزب الاستقلال هو القوة السياسية الأكثر تمثيلية وقدرة على تنزيل مشروع الحكم الذاتي، نظراً لتجذره الانتخابي في الأقاليم الجنوبية.

وفهاد اللقاء ديال الويكاند، شدد بركة على مجموعة من الرهانات الأساسية المنوطة بالحكومة المقبلة، في مقدمتها تفعيل مشروع الحكم الذاتي تحت السيادة المغربية بما يعزز الوحدة الترابية لبلادنا، إلى جانب ضرورة تقليص الفوارق المجالية والاجتماعية، ورفض استمرار وجود مغرب بسرعتين، وهو ما استدعى إطلاق برامج تنموية ترابية مندمجة بميزانية تصل إلى 210 مليارات درهم على مدى ثماني سنوات.

واعتبر بركة أن الحكومة الحالية هي “حكومة إطلاق الأوراش”، بينما ستكون الحكومة المقبلة هي “حكومة جني الثمار”، مما يوحي باستعداده لتسلم المشعل لإتمام المسار التنموي.

بركة مشكلتو الوحيدة، هي التاريخ الأسود لحزبو “الاستقلال”، بسباب حكومتهم كان احتقان كبير فالبلاد، كانت فضيحة النجاة وجا موراها حراك شعبي، الشي لي دفع بالبلاد دير دستور جديد وانتخابات مبكرة للي طلعو الاسلاميين. واصلا الاسلاميين فالمغرب للي كيأمنو بالمشاركة السياسة أقرب من الاستقلال. يعني غاتعطا فرصة باش هاد الاسلاميين يرجعو بقوة.