أكد المدير العام ديال الوكالة الوطنية لتقنين الأنشطة المرتبطة بالقنب الهندي، محمد الكروج، باللي حصيلة سنة 2025 عرفت طفرة مهمة، مني وصل الإنتاج الإجمالي لـ 19 ألف و576 قنطار من المادة الجافة ديال الكيف، مقارنة مع 18 ألف و810 قنطار فـ 2024.

ووضح الكروج، فحوار مع لاماب، باللي الوكالة عطات ف 2025 4147 رخصة جديدة، باش يوصل العدد الإجمالي ديال الرخص النشيطة لـ 5765 رخصة فموسم 2025.

وزاد قال باللي هاد الرخص كتشمل 5492 رخصة ديال الزراعة (يعني 99% من مجموع الرخص) لفائدة 5318 فلاح، وزيد عليهم 273 رخصة ديال التحويل والتسويق والتصدير واستيراد البذور والنقل، لفائدة 183 فاعل.

وأكد حتى أن الحصول على الرخصة كيبقى مربوط قانونياً بضرورة توقيع عقد شراء مسبق مع المنتجين المرخصين، واللي كيتحدد فيه الثمن وطريقة الأداء.

وفي نفس السياق، قال باللي المساحة الإجمالية اللي تحصدات فـ 2025 وصلات تقريباً لـ 3141 هكتار من طرف 4776 فلاح، منها 2622 هكتار مخصصة للصنف المحلي “البلدية”، و519 هكتار للصنف المستورد.

وعلى مستوى التصنيع، وضح الكروج أن 5 فاعلين بنّاو وجهزو مصانع للتحويل بطاقة إجمالية ديال 560 طن، وكاينين 11 مصنع آخرين مازال فالإنجاز ،وأضاف باللي التركيز فـ 2025 كان على التسويق، واللي خلا المنتوج الوطني ديال الكيف يتواجد فـ أكثر من 600 نقطة بيع مرخصة.

وفيما يخص المنتوجات الطبية، قال باللي تسجلات فـ 2025 حوالي 110 منتوج عند الوكالة المغربية للأدوية والمنتجات الصحية، منهم 50 مكمل غذائي، و59 منتوج تجميلي، ودواء واحد، وبهذا وصل العدد الإجمالي للمنتوجات المتوفرة فالسوق لـ 141 منتوج.

وعلى الصعيد الدولي، أكد أن المنتوجات المغربية ولات حاضرة فـ أكثر من 7 دول، بحال فرنسا وسويسرا والتشيك ولوكسمبورغ والبرتغال وأستراليا وجنوب إفريقيا، بدعم من بعثات ترويجية نظّماتها الوكالة فعدة عواصم أوروبية.

وشدد كذلك على أن هاد النتائج تحققات مع احترام صارم للقانون، حيث دارت الوكالة 7526 عملية مراقبة، ونتج عليها سحب 111 رخصة من 90 فاعل، وفتح مسطرة إنذار بسحب 150 رخصة من 85 فاعل، وزيد عليهم سحب 1308 رخصة زراعية من 1217 فلاح.

وفي الأخير، نوه الكروج بالانخراط ديال الفاعلين والمستثمرين والفلاحين فاحترام القانون، وبالتعاون ديال مختلف الشركاء من سلطات ومؤسسات وقطاعات حكومية، وكذا الفاعلين فمجال الصناعات الدوائية، لتطوير قطاع القنب الهندي فالمغرب.