المغرب باقي دولة فقيرة الشباب ديالها كيفضل يهاجر لغابات الامازون في البرازيل ومايبقاش فيها، ومع ذلك وعلى خلاف باقي الدول الفقيرة لي كتكون فيها المواليد كثيرة حنا كنعانيو من موشكيل ديال الدول المرفحة، الشباب المغربي مابقاش باغي يولد داخل اطار الزواج والقوانين لي دايرة الدولة، وهادشي على خلاف الدول المرفحة لي كيساهم التمدرس والمسار المهني في تأخر الزواج ومعه الإنجاب، المغرب شبعان هدر مدرسي ومكيولدوش، بسباب الازمة والفقر والغلاء وتخلي الدولة على الأساسيات، غادي تولد ولد تلقى راسك واخل فيه خاصك تقريه وتداويه وتطببو من جيبك مع تعويضات طبعا، ولكن راه غا أنا في صغري مثلا، كانت المدرسة العمومية مخيرة وقراوتي أساتذة واعرين، ومستوصف الحي كان فيه العلاج والدوا فابور وكتاخدو في البلاصة، وغير مستوصف صغير كان نقي وفيه طبيبة ديال الجلد وطبيب عام، وقاعة ديال العلاج، هادشي ماشي من واسي راه باقي أصلا مفتوح مستوصف المصلى جنب رياض عين قطيوط، دابا الى ولدتي غادي تلقى راسك عبد لولادك ولإحتياجاتهم ومتطلباتهم وحتى واحد ممعاونك فيهم.

في أوروبا كيعانيو هاد الموشكيل طبعا ولكن دارو قوانين كتسهل الحياة على المواطنين، مثلا مابقيتيش محتاج العدول وجوج شهود والدقايقية والطبالة والغياطة وخالت لعروسة ومت لعريس باش تعيش مع الشريك ديالك في تفس البلاصة، كاينة المساكنة وينضمها القانون والأطفال لي تزادو فيزالمساكنة هوما أطفال شرعيين، كاغيط مصاوبو عند عدول ماغادي يبدل والو، هاعلاش في فرنسا أكثر من ستين في المية من الولادات الجدد خارج إطار الزواج، وطبعا ماغاديش تشوف في الشارع أطفال كيشمو السيليسيون في المحطات الطرقية، هاد المشاهد غادي تشوفها في المغرب لي كيعاقب على أي علاقة خارج اطار الزواج، وأي طفل تزاد خارج الزواج لاينسب لأبيه واخا يديرو تيست ديال الحمض النووي لي نيت كيستدلوا بيه في الجرائم، بيناتنا واش كاين شي تخلف كثر من هذا.

وا الدولة إلى باغا المغاربة يولدوا وترجع ليهم الخصوبة خرجي من گرصونهم ومتعقديش الحياة عليهم بالقوانين المتشدد البشر ممحتاجينش كاغيط عند العدول باش يمارسوا الحب أو يولدوا، البلاد لي تلقى فيها جوج شباب كيمارسوا الحب حتى كيتجمعوا عليهم الجيران وتحضر السطافيط وبنادم كيصور طالق لايف، والنيابة العامة كتابع استنادا إلى فصول في القانون، راه هادي بلاد غادا للإنقراض مافيهاش، الأرقام راه كاينة عند الدولة وماهافيش عليها فين غادي المغرب، راها خاصها تحرك وتفك الخنقة ديال القوانين المتشددة على المغاربة، ومع ذلك شوف تشوف واش يتحسنوا الأرقام، المهم على الأقل بنادم غادي يعيش في مجتمع فيه ريحة الحرية.