دفاع بعيوي فقضية “إسكوبار الصحرا”: الحاج بن إبراهيم هضرتو متناقضة وتصريحاتو كولها كذوب .

مصدر الصورة

أميمة عطية كود ـ كازا ///

تواصلات اليوم الخميس بمحكمة الاستئناف فكازا جلسات المرافعة فقضية “إسكوبار الصحرا”، اللي متابعين فيها سعيد الناصري وعبد النبي بعيوي، مع متهمين خرين.

الجلسة حسب مصادر خاصة بـ” كود” تركزات هاد المرة على مرافعة دفاع عبد النبي بعيوي، اللي شدد بزاف على التشكيك فمصداقية التصريحات ديال الحاج بن إبراهيم، واعتبر باللي أقوالو ’’متناقضة وكاذبة ومايمكنش المحكمة تعتمد عليها‘‘.

المحامي أحمد ضنين، دفاع بعيوي، كال بللي كاينين ملفات مرتبطة بالقضية تصدرات فيها أحكام نهائية من قبل، وماجاب حتى حكم منهم سميا ديال بعيوي، وأكد أن احترام هاد الأحكام ضروري باش تبقى الثقة فالعدالة.

وزاد المحامي هاجم اعتماد قاضي التحقيق على تصريحات الحاج بن ابراهيم فملفات تتعلق بالتزوير والمخدرات، وكال بالحرف إن تصريحاتو “كاذبة فالمحاضر وحتى فالتواريخ والشهود”، ووضح أن الملف فيه حوالي 296 محضر، ولكن المحضر الوحيد اللي فيه شوية ديال الحقيقة حسب الدفاع هو ديال 23 غشت 2023.

الدفاع أكد حتى أن الحاج بن إبراهيم بدل أقوالو عدة مرات بين 2018 و2023، وكان كيقدم راسو كرجل أعمال ودبلوماسي، وهي الصورة اللي كالو شهود بحال لطيفة رأفت وفدوى أزيلاي باللي كان كيوهم الناس بها، وحتى توفيق زنطاط ونبيل الضيفي، حسب الدفاع، أكدو أنه اختفى مدة من المغرب وخلا حتى المستخدمين بلا خلاص.

المحامي اعتبر أن أخطر تصريح دارو الحاج بن إبراهيم كان فـ15 غشت، ملي هضر على عمليات مخدرات، وقال إنه كان كينسق من داخل الحبس، قبل ما يرجع ينفي كلشي ويقول إنه كان معتاقل فموريتانيا فداك الوقت.

وفالأخير، شدد الدفاع أن اسم بعيوي ماجا حتى فالمسطرة المرتبطة بحجز شحنات المخدرات واعتقال المتهمين، وزاد ضاف أن المحكمة الابتدائية سبق وحسمات فهاد الوقائع بحكم نهائي عندو حجية قانونية.

والجلسة ديال اليوم تأجلات حتا الـ14 ماي لإتمام لمرافعات.