فاليوم العالمي ديال القنب الهندي.. علاش مانظموش مهرجان دولي ديال الكيف؟ .

مصدر الصورة

كود -عثمان الشرقي //

ف20 أبريل من كل عام كيتجمعو الآلاف ديال الناس فـواشنطن ونيويورك و امستردام وفكولومبيا وعدد من مدن العالم باش يحتافلو بنبتة ديال الحشيش فموعد عالمي ماشش رسمي كيدخل فإطار الثقافة المضادة.

فهاد السياق عدد من الفاعلين الثقافيين فالمغرب كيسولو علاش المناطق اللي عندها تاريخ مع هاد النبتة ما متأسسش مهرجان دولي كيحتافل بهاد النبتة؟

المبررات لي كيحتاكمو ليها هي ان منطقة الريف فالمغرب بحكم الطبيعة والتاريخ ديالها، هي من أقدم المناطق اللي كتنتج الكيف فالعالم، وحتى الأمم المتحدة كتشير أن المغرب من لوالا فانتاج الكيف , ولكن هاد الثروة الاقتصادية والثقافية متبلوراتش، فحين دول أخرى ولات كتربح منها فالسياحة والضرائب بحال
التجربة ديال مريكان كتعطي مثال كبير ملي شرّعات ولايات بحال كولورادو الكيف ورجعات منو صناعة سياحية واقتصادية كدخل منها ملابين الدولارات .

المغرب بدا كيمشي فهاد الطريق ولكن غير بشوية, ف 2021، خرج قانون تقنين الاستعمالات المشروعة للكيف لي عطا حلّ فرصة جديدة المنطقة ولكن التطبيق مازال ما وصلش للمستوى اللي كانو كيتسناو الساكنة، وهنا فين كاينة الفرصة حيت الريف بالمناظر الزوينة ديالو، والتاريخ، والقرب من أوروبا، يقدر بسهولة يحتاضن مهرجان دولي للقنب، ويولي وجهة سياحية عالمية، ويحوّل واحد الحاجة اللي كانت مشكل قانوني لفرصة اقتصادية.

و ماشي بالضبط خاصنا نقلّدو أمستردام ولا مدن بحال دنفر، ولكن نصايبو مهرجان وطني كيجمع الثقافة الأمازيغية، الموسيقى الجبلية، الفلاحة التقليدية، ووورشات صناعة القنب بطريقة قانونية ، وتنظم جولات ميدانية فالمزارع ديالو باش الزوار يتعرفو على طرق الزراعة التقليدية والعصرية، ومعارض كتجمع التعاونيات المحلية لعرض المنتجات المشتقة من القنب فالمجالات الطبية والصناعية وندوات علمية واقتصادية فيها خبراء ومستثمرين كيناقشو مستقبل هاد القطاع ،وممكن تكون حتى فضاءات للتذوق (في إطار قانوني مضبوط) وتجارب سياحية مرتبطة بالطبيعة الجبلية.

أما من ناحية الفائدة الاقتصادية، فبحال هاد المهرجان يقدر يخلق حركية كبيرة فالمنطقة حيث يقدر يوفر مناصب شغل مهمة وتحرك السياحة الداخلية والخارجية فالمنطقة وتشجع الاستثمار فالفلاحة والصناعة المحلية ديال الكيف عاد الارباح ديال الجماعات لي فالمنطقة.