تكرفيص سكان المدينة القديمة فكازا سالا.. الديور القدام تهدمو واستافدو من بارطمات كتحفظ كرامتهم .

مصدر الصورة

أميمة عطية – كود كازا ///

هبطات “كود” ودارت دورة في وسط درب موحا أوسعيد، فين السلطات المحلية بدات كتطوق دروبا وتخلي المنطقة من السكان هاد الصباح ، الاثنين 20 أبريل اللي مازالين، باش استعد الحي لانطلاق عملية لهدم .

ودورة من ورا دورة ، عن قرب
” كود” قدرات تشوف لواقع اللي كان عايش فيه هاد لحي أعوام : دروبا مضيقين، ديور قديمة وايلة للسقوط، وريحة خايبة كتشمها من بعيد ، فغياب بزاف ديال شروط العيش اللائق، الشي اللي كان كيزيد يعقد الحياة اليومية ديال الساكنة.

ومع تقدم عمليات الهدم، هاد المشاهد ولا كيبين تدريجياً، أن الساكنة كانت محتاجة تخرج من هاد لقوقعة باش تستافد من ظروف احسن ، ومن هاد لجحيم، باش امشيو بارطمات واخا بعيدة ولكن كتحمي كرامة لمواطن لبيضاوي ، على الأقل السكان لي استفادوا، صرحو ل “كود ” انهم فرحانين واخا بعدو من وسط لمدينة .

المشروع الجديد ماشي غير هدم وبناء، بل رؤية حضرية كتستهدف تحسين جودة العيش، من خلال سكن منظم، عمارات نظيفة، وبنية تحتية حديثة، إضافة لفضاءات أكثر انفتاحا مقارنة مع الوضع السابق.

وللإشارة فقط ، كلشي كيتسنا ، مشروع المحج الملكي” يعطي دفعة قوية للمنطقة، حيت غادي نشط التجارةو جذب الاستثمار والسياحة، و غادي يساهم فإحياء القلب التاريخي لكازا.

كما كيراهن المشروع على تعزيز الإحساس بالأمان، عبر تنظيم الفضاء العام وتقليص مظاهر الفوضى اللي كانت فبعض النقاط، وتعويضها ببيئة حضرية أكثر وضوحا ونظام.

وبين موحا وسعيد ودرب الرماد، كيبان أن المدينة القديمة داخلة لمرحلة جديدة، عنوانها التغيير، والرهان ديالها هو التوفيق بين ماضي المنطقة وبناء مستقبل حضري أكثر تنظيم ورقي.