بدات السلطات المحلية هاد الصباح فكازا كتطوق زنقة موحا أوسعيد بلمدينة القديمة باش اخليوها من السكان لي باقين وباشرو من بعد عملية لهدم ، استعداداً لمشروع “المحج الملكي”، لي كتهيئ ليه لعاصمة الاقتصادية .

وفي جولة ميدانية دارتها ” كود” ، شهد هاد الحي ، ترتيبات أمنية مكثفة من صباح ، بحضور السلطات المحلية بجميع شرائحها ، والقوات المساعدة .

وفجو عامر بالدموع والحسرة ، ودعو ولاد وبنات موحا أوسعيد ، هاد الدرب لقديم لي عاشو فيه ذكرياتهم ، صغار وكبار ، وبقا غير لحوانت والديور خاويين ، وحيوطا كيتسناو نوبتهم باش اوليو رماد.

وفي تصريح خاص لي ميكرو” كود” من وسط حي موحا أوسعيد، عبرات الساكنة على الإستياء ديالها ، وخصوصا أنهم غادي ابعدو على وسط لمدينة بكازا من بعد ماكانو قراب لكلشي جغرافيا، وعلى لبحر لي عندهم معاه علاقة كبيرة .

وفي هاد السياق ، و ردا على سؤال ميكرو”كود”، شنو احساس الساكنة من بعدما غادي ابعدو على وسط لمدينة واتفرقو ؟ كال شاب من ولاد درب موحا أوسعيد ، أن علاقتهم بهاد لمكان صعيب توصف ، وأن ديورهم ماشي كهوف وبلي زخرفة لبناء ديالهم مخسور عليها لفلوس .

وزاد عبر على الحزن ديالو وأضاف “تشتتنا وهادشي لي بقا فيا ، مابقيناش غادي نلقاو بحال هاد جورة.”

ومن جهة اخرى ، عبر نفس الشخص على لحسرة لي كيجي بها من جهة الناس لمتعوضوش، بحيت انه أكد على انه كاين ناس لي معوضوش ليهم ومعندهومش فين امشيو ، وكيطالب لمسؤولين في هاد الصدد ، اشوفو من حال الطبقة ضعيفة ، وديرو معاهم حل قبل ما يتشردو.

وبالنسبة لبنات هاد الدرب، صرحت شابة وكالت أنها غادي توحش زنقة ، وصحباتها لي بحال خوتاتها ، والأمان لي كانت كتحس به فالدرب ، وبلي صعيب تعاود كلشي من زيرو.

وزادت عبرات المتحدثة ، على الغضب ديالها بسبب لبعد لي ولات كتعاني منو فالخدمة ، وفسرات لنا بلي ولات متشرب 45 دقيقة غير باش توصل لخدمة ، من بعدما تم نقلها هي وعائلتها لأندلس ، بوسكورة .

وبين موحا أوسعيد لقديم وجديد حياة أخرى غادي تبعت من تحت الأنقاد ، وفي انتظار استكمال السلطات عملية الإخلاء لكامل المنطقة ، غادي اجيو تراكسات من بعد ما انتاهيو من لهدم بدرب رماد لي كاين ملاصق معاه ، باش اكملو ما بداوه فلمدينة لقديمة .

و للاشارة، هاد الحملة جات من بعد عمليات هدم كبيرة دازت فدروب أخرى بحال درب الرماد، درب المعيزي، درب حمان، درب طاليان، درب سينغال، درب الإنجليز، ودرب بوطويل، وشي كاريانات .

مصدر الصورة مصدر الصورة مصدر الصورة مصدر الصورة مصدر الصورة