النسخة الوحيدة في العالم حاليا ديال الدولة العربية الإسلامية الناجحة هي الإمارات، اقتصاد قوي ، الامان في الشوارع، بنية تحتية عالمية، شعب قاري وواعي وعايش مزيان، وعندو باسبور كيساريه العالم ماشي بحالنا كنبقاو نجمعوا في ملف قد ملف الصحرا عند الامم المتحدة، غير باش نعطيو ضمانات اننا غادي نرجعوا لبلادنا أحسن بلاد في العالم ومع ذلك بزاف مكيديروهاش .

مصدر الصورة

محمد سقراط-كود///

النسخة الوحيدة في العالم حاليا ديال الدولة العربية الإسلامية الناجحة هي الإمارات، اقتصاد قوي ، الامان في الشوارع، بنية تحتية عالمية، شعب قاري في أكبر جامعات العالم وواعي وعايش مزيان،وعندو باسبور كيساريه العالم ماشي بحالنا كنبقاو نجمعوا في ملف قد ملف الصحرا عند الامم المتحدة، غير باش نعطيو ضمانات اننا غادي نرجعوا لبلادنا أحسن بلاد في العالم ومع ذلك بزاف مكيديروهاش، وطبعا وجهة للهجرة أغلب هادو لي كيضلو يسبوها كون يلقاو كونطرا ليها مايصبحوش هنا، وكاين لي كيخلص الفلوس باش يشري كونطرا تخليه يعيش تم ويخدم، ويديو معاهم حتى مهم وباهم وختهم وخوهم، هاعلاش كولشي كيسبها وباغي يشوفها مخربة ورايبة وضعيفة، وكيضحكو عليها في كل مناسبة، والقوادة هي كيوصفوا شعبها وحكامها بالغباء وأنه لولا البترول والغاز مكانوش يوصلوا لهادشي، وعلاش ماوصلات ليه الجزائر هاهي غير حدانا حاصلة في التمانينات علما انها قبالت أوروبا من اهم أسواق الطاقة في العالم، وعلاش منجحاتش فينزويلا وعدة دول أخرى عندهم ثروات كثيرة، الفرق هو الامارات عندهم قيادة ذكية منفتحة معندهاش موشكيل مع العصرنة.

الكره ديال العامة للإمارات في اللول كيبان غير مفهوم ولكن غير تشوف كيفاش عايشين كاع الشعوب لي كيسبوا الإمارات وتقارنهم مع نمط عيش الإماراتيين غادي تعرف السبب، والموشكيل بزاف ديال هاد الشعوب كيظنوا أن الإماراتيين لايستحقون داك الثروة وانها كون كانت عندهم كون عاونوا بيها الامة العربية من المحيط للخليج، وصرفوها كلها في محاولة تحرير القدس وإقامة دولة فلسطين وطرد اليهود للبحر، ولكن للأسف الثروة عطاها الله لناس مايستاهلوهاش، هذا هو الخطاب ديال عريبان المنتشر في مصر والجزائر والمغرب وباقي الدول لي مقاتلة مع الوقت وكيحسوا بلي التاريخ والجغرافية ظلموهم، وأنهم كون كانت عندهم ثروة الامارات كانوا غادي يطفروه كثر وينفعوا راسهم وينفعوا كاع العرب والمسلمين معاهم.

الإمارات خاص تكون قدوة ومنارة يهتدي بها العرب والمسلمين وگاع الدول لي باغا تبدى من زيرو وتبني اقتصاد قوي ومحترم، وتدخل في استثمارات وشراكات وحتى صناعات متطورة، راه غادي تولي تصنع الرقائق الالكترونية، إييه يقدرو مايكونوش اماراتيين هوما العمال وغادي تعتامد على العمالة الأجنبية، ولكن راهم غادي وطنوا صناعة متقدمة ومهمة في المستقبل في بلادهم، وهادشي خاص يديرو حتى المغرب حيت هاد الصناعة مهمة لصناعات السيارات وخصوصا الكهربائية، ومن غير هادشي راه حتى مواقف هاد البلاد السياسية خاصها تكون قدوة لأنها كتعتامد على النفعية السياسية وهادشي لي داروه في سنغافورة وسويسرا وگاع الدول الصغيرة لي طورات اقتصادات متطورة، العنجهية والعنتريات ودخول الصحة وتبني قضايا الآخرين كيرد البلدان لأسفل سافلين.