دول الاتحاد الأوروبي غادي يطلقو نظام رقمي جديد كيتعلق بالمسافرين الجايين من برا الاتحاد، ولي من بينهم المغاربة باش يقويو مراقبة الحدود ويضبطو مدة الإقامة ففضاء شنغن بدقة أكبر.

النظام غادي يعتمد على قاعدة بيانات بيومترية متطورة، فيها بصمات صبعان وتصاور الوجه، والمعطيات غادي تبقى مسجلة لمدة 3 سنين، هاد الشي غادي يخلي السلطات تقدر تتبع تحركات المسافرين ديما وتحسب مدة الإقامة ديالهم بالنهار والساعة حسب القوانين.

فإسبانيا، وزارة الداخلية صرحات أنهم كملو تجهيز مطار مدريد-باراخاس بأنظمة المراقبة ونقاط الخدمة الذاتية، وغادي يعمموها فمطارات أخرى بحال مالاغا وبالما دي مايوركا وحتى سبتة ومليلية، وفرنسا حتى هي بدات كتستعمل هاد النظام فبعض المعابر الحدودية.

حسب المطارات وشركات الطيران، التسجيل الأولي ممكن يطول الوقت ديال المرور بين خمس تال لعشرة دقايق، وباش يتفاداو الزحام، شركة “Aena” دارت باساجات بيومترية للمسافرين فساعة الزحام .

هاد النظام غادي يعوض طبيع الباسبور يدويا بتسجيل إلكتروني تلقائي، وغادي يمنع بعض القوالب اللي كانو شي مسافرين كيديروها بحال تغيير تواريخ الإقامة والخروج من شنغن لفترة قصيرة باش يرجعو يحسبو مدة الإقامة من جديد.

هاد التغيير كيأثر حتى على الشركات، خصوصا اللي عندها موظفين كيسافرو لإسبانيا، حيث التوفر على وثائق إقامة صالحة ومدة الإقامة القانونية ولات مراقبة آلياً، وأي خطأ ممكن يحتم عقوبات على مولاه.

مراقبين كيقولو بلي المغرب حتى هو مطالب باش يفكر فاعتماد نظام رقمي بحالو فالمطارات المغربية، باش يسهل متابعة المسافرين ويضمن الامتثال للقوانين، ويقلل التزوير والأخطاء فتواريخ السفر، هاد الشي غادي يحسن التنظيم ويختصر الوقت على المسافرين، ويخلي المراقبة دقيقة، خصوصا مع كثرة الرحلات الأوروبية اللي كتخرج من المغرب يومياً، تطبيق هاد النظام غادي يكون خطوة مهمة باش تطور البنية التحتية للمطارات المغربية ويتقوا الأمن والرحلات الدولية.