السيبا مكيناش فالبلاد.. محامية تكشف لـ"كود": هادو هوما العقوبات اللي كيتسناو المعتدي على مول الكاميو بالقنيطرة ..من 10 حتى 20 سنة حبس .

مصدر الصورة

كود كازا//

من بعدما شهدات المنطقة الصناعية “أولاد بورحمة” فالقنيطرة واقعة عنف خطيرة اعتدى فيها سائق حافلة على سائق شاحنة باستعمال “هراوة”، وتسبب له في جروح خطيرة على الرأس، قبل ما يتدخل الدرك الملكي ويوقف المشتبه فيه، حيث ان الفيديو ديال الواقعة دار ضجة كبيرة فمواقع التواصل الاجتماعي، وجب طرح تساؤلات قانونية مهمة لتنوير الرأي العام : شنو هي العقوبات اللي ممكن تواجه المعتدي؟ واش القانون كيغطي هاد الحالات بصرامة؟
وفي هاد السياق ، وفي تصريح خاص ل “كود “، قالت الأستاذة لبنى الصغيري ، محامية بهيئة الداربيضاء ، إن : ” الاعتداء اللي وقع خطير بزاف، الضربة كانت قوية والقتل وارد خصوصًا مع سبق الإصرار والترصد، حيث المشتبه فيه هز العصا وضرب الضحية بشكل مباشر، مضيفة أن هاد الواقعة كتبرز التخطيط والترصد في الفعل، وكتخضع لأحكام قانونية صارمة.”
” ووفق ما أشارت له الأستاذة الصغيري فإنه حسب القانون المغربي، العقوبات كتختلف حسب خطورة الفعل والنتائج ديالو والاحتمالات الممكنة كتنقاسم عقوبة السجن فيها حسب المواد المؤطرة لها :

المادة 402: كتهم سبق الإصرار والترصد مع استعمال السلاح، والعقوبة فيها كتوصل من سنتين حتى 5 سنوات.
المادة 403: إذا الضربة تسببات في عاهة مستديمة أو إصابات خطيرة، بحال فالرأس أو البصر، هنا العقوبة كتكون من 5 حتى 10 سنوات.
وختامت المتحدثة بالمادة 404: لي ادا الضربة أسفرت على الموت بلا نية قتل مسبقة ، كتولي العقوبة السجنية من 10 حتى 20 سنة حبس.

ومن جهة أخرى ومن الناحية القانونية، هاد الواقعة كتعتبر نموذج واضح للجريمة اللي فيها سبق الإصرار والترصد، بحيث المشتبه فيه دار التخطيط قبل ما ينفذ الفعل، وهذا كيزيد من خطورة التهمة، وفي هاد الحالة إذا ثبت للمحكمة أن الاعتداء تسبب فموت الضحية أو إصابة دايمة، العقوبة كتكون صارمة، وكتمثل رادع قانوني واضح للآخرين.