ضربة مور ضربة للعديان. دعم مستمر لمغربية الصحراء من أمريكا اللاتينية.. الوفا: المغرب شريك موثوق ومبادرة الحكم الذاتي هي الحل الوحيد للي عليها دعم دولي .

مصدر الصورة

كود الرباط//

أكد المستشار عبد الرحمان الوفا، عضو مكتب مجلس المستشارين وممثل البرلمان المغربي لدى برلمان أمريكا اللاتينية والكراييب، أن المغرب ولى اليوم شريك موثوق عند دول المنطقة، بفضل الرؤية الاستراتيجية للملك محمد السادس، خصوصا في إطار التعاون جنوب–جنوب، اللي تعزز بزاف منذ الزيارة الملكية التاريخية لسنة 2004.

وجاء هاد التصريح خلال كلمة الوفا فالجمعية العامة السنوية لبرلمان أمريكا اللاتينية والكراييب (برلاتينو) المنعقدة فبنما يومي 26 و27 مارس، فين شدد على المكانة اللي ولى كيحتلها البرلمان المغربي، باعتبارو أول برلمان إفريقي وعربي كيتحصل على صفة عضو ملاحظ دائم داخل هاد الفضاءات البرلمانية الإقليمية.

الوفا ما وقفش غير عند التعاون المؤسساتي، وذكر بالأبعاد الاستراتيجية لعدد من مشاريع المملكة، خصوصا مبادرة المغرب لتمكين دول الساحل من الولوج للمحيط الأطلسي، واللي كتعكس طموح المغرب باش يبني محور اقتصادي وتنموي قوي كيجمع 23 دولة إفريقية مطلة على الأطلسي.

وفنفس السياق، كشف المسؤول البرلماني على إطلاق مبادرة إنشاء منتدى برلماني اقتصادي بين المغرب ودول أمريكا اللاتينية والكراييب، واللي الهدف منها هو خلق إطار دائم للحوار والتعاون بين المؤسسات التشريعية، وتطوير الشراكات فمجالات متعددة.

الرسالة السياسية الأهم فهاد المشاركة هي استمرار الدعم للمتزايد وغير مسبوق للوحدة الترابية للمغرب.

الوفد المغربي، حسب الوفا، لمس خلال اللقاءات الثنائية مع عدد من الوفود البرلمانية، تأييد قوي لمغربية الصحراء ولمبادرة الحكم الذاتي، اللي كيتعتابروها هاد الدول “الحل الوحيد والأساس الأممي” لإنهاء النزاع المفتعل حول الصحراء المغربية.

هاد الدينامية الجديدة كتبرز أن المغرب ما بقاش غير حاضر دبلوماسياً، ولكن ولى كيبني تحالفات استراتيجية بعيدة المدى، خصوصا فمناطق كانت تقليدياً بعيدة على التأثير المغربي، بحال أمريكا اللاتينية.

المؤشرات كلها كتمشي فاتجاه واحد بلادنا كتربح شركاء جدد داعمين لها ف ملف الصحراء، والمغرب كيعزز موقعو كفاعل إقليمي ودولي موثوق.