كاين الخلايا النائمة لي كتفككها الدولة، وكاين الخلايا الفايقة في المواقع الاجتماعية والنائمة مع عيالات بعضياتهم، مخلياهم الدولة ناشرين تطرفهم في الويب المغربي، عندهم موضوع واحد هو الأنثى وماشي مهم السن من نهار تخرج من كزش مها حتى تموت، هاشنو خاص تلبس وهاشحال خاص تخرج من مرة في حياتها، وهافين خاص تگلس واش تخدم أو تبقى گاعدة، واش تعري شعرها ولا تباشيه، وجهها يبان حدا نسيبها أو تغطيه، كأن الدين بالنسبة ليهم تدار غير للمرة يحبس دين مها بحال شي ڤومپير، ونهار يخرجوا العيالات فطبعا سيعم الفساد والرذيلة وغادي ينزل علينا غضب الله وتحبس الشتا ويبدى يطيح الحجر ديال النار، بحال هاداك لي كتسيفط ميريكان لإيران.

نهار تقوليهم بغينا الخيانة الزوجية ماتبقاش جريمة يعاقب عليها القانون لأنها علاقة بين جوج بالغين، تقدر تعطي امتيازات للطرف المتضرر في الطلاق، اما يدخل عليها بنادم للحبس معندها معنى، داك الساعة كيخرجوا اللحايا بصوت واحد بغيتوا تشيع الفاحشة في البلاد، ونهار تقوليهم بغينا الغاء تجريم العلاقات الرضائية بين البالغين، كيبداو يتاهموك بأنك كتطالب بتحويل المغرب لدار دعارة كبيرة، بينما في الواقع هوما كل مرة خارجين وحدين منهم فشي فضيحة جنسية، ويا شحال عزيز عليهم المزوجين، مكتحلاش ليهم إلا مع شركاء إخوانهم وأخواتهم، وتسمعهم كيهدرو على الأخ فلان والأخت فلانة باركة الله فيها، تقول هادو هوما الخصمان، وفي الحقيقة راه دجاجة ماتخليهاش معاهم مابقى غير بنادم.

راه في حالة المغرب ألغى تجريم العلاقات الرضائية وتجريم الخيانة الزوجية، راه اللحايا لي غادي يكونوا مستافدين كثر من الحداثيين لأنهم هوما أكبر المتضررين من هاد القوانين ذات الصبغة الدينية، كل مرة حاصلين وحدين منهم وفي الغالب مزوجين، وغير مع المقربين، الموشكيل هو الخطاب المتطرف الميزوجيني لي كيظلوا يروجوا ليه العام كامل في الويب، وحتى مع عيالاتهم كيعتابروهم نص بنادم غا لي جا يديرها بيهم، وطبعا الدولة سامحة في هادشي عوض تاخد موقف حداثي مدني مشرف بحال لي دار بنسلمان في السعودية جمع گاع المتطرفين ودعاة التطرف وسيفطهم للحبس، راه گاع لي كيقسم العيالات لمتبرجات ومستورات بالنسبة ليا متطرف إرهابي وخطر على البلاد والعباد، ولكن للأسف لقاو الدولة دايرة ليهم خاطرهم.