مورا التزميمة ديال ترامب..البرميل ديال البترول نزل ب13%..واش حتى فالمغرب غادي يهبط ؟ .

مصدر الصورة

كود – كازا //

بتزميمة وحدة على “تروث سوشيال”، طفى دونالد ترامب العافية لي كانت شاعلة فبورصات الطاقة مورا سيمانات ديال التنشيط فالسوق الدولية .

أسواق الطاقة العالمية اليوم الاثنين هبطات لما فيها البترول بنسبة 13%، بعد ما علن الرئيس الأمريكي دونالد ترامب أنه غادي يأجل أي ضربات عسكرية محتملة ضد منشآت الطاقة والبنية التحتية ديال إيران.

وحسب بيانات وكالة “رويترز”، هاد “التهدئة على غفلة ” بان أثرها مباشرة فشاشات التداول، وخففات من الخوف اللي كان مسيطر على المستثمرين طول السيمانات اللي فاتت.

خام برنت هبط ب 17 دولار يعني تقريبا 15%، والبرميل نزل 96 دولار ، المحللين كيشوفو أن قرار ترامب اللي عطى الدبلوماسية مهلة “خمسة أيام” خفف مؤقتا من الخطر ديال بلوكاج الإمدادات من مضيق هرمز، وهادشي خلى المستثمرين يبيعو ويحققو أرباح، خصوصا اللي كانو مراهنين على أن الاتمنة غادي تطلع بزاف إذا تگعدات “حرب المحطات”.

محليا سوق المحروقات فالمغرب كيبقى مرتبط بشكل شبه كلي بالسوق الدولية، بحكم مكاينش إنتاج وتخزين محلي ، التصعيد العسكري فـالشرق الأوسط كيخلق ضغط على الاتمنة بسباب الريسك المرتبط الإمدادات، خصوصاً فطرقان استراتيجية بحال مضيق هرمز ،هاد العامل كيأثر مباشرة على اتمنة النفط الخام، ومن بعد كينتاقل الأثر لسوق التوزيع الداخلي.

فالمقابل التوازن فالسوق كيبقى خاضع لعوامل خرى، بحال مستوى الإنتاج العالمي وحجم المخزونات، عاد الطلب الدولي.

بالتالي، فالسيمانات الجاية ضعيب نشوفو انخفاض كبير فثمن المازوط وليصانص فالمغرب، إلا إذا حبسات الحرب ورجع العرض العالمي كيفوت الطلب.