البام حاير فـ“دائرة الموت” فكازا.. تزكية كوكوس تكون وكيلة لائحة مازال ما تحسماتش وبروفايل لي يعوض بلاصت الناصيري مكاينش .

مصدر الصورة

كود الرباط//

حزب الأصالة والمعاصرة ما حسمش بشكل نهائي فاختيار وكيل اللائحة ديالو فدائرة أنفا بالدار البيضاء، اللي ولات معروفة وسط السياسيين بـ“دائرة الموت” بسبب شدة المنافسة فيها، ووزنها الانتخابي الكبير.

وحسب المعطيات المتوفرة، ف إسم نجوى كوكوس، رئيسة المجلس الوطني ديال الحزب، مازال مطروح بقوة، ولكن التزكية ديالها ما تعطاش فيها “الضوء الأخضر” النهائي من طرف القيادة الجماعية، وسط نقاش داخلي حول القدرة ديالها تعوض الفراغ الكبير اللي خلاه سعيد الناصيري المعتقل في ضوسي اسكوبار الصحراء.

المشكل ماشي غير فاختيار اسم، ولكن فالثقل الانتخابي. الناصيري كان واحد من أبرز الوجوه اللي كتعرف كيفاش تدبر المعركة الانتخابية فأنفا، وغيابو بسبب المتابعة القضائية خلا الحزب فموقف صعيب، كيقلب على شخصية تقدر تحافظ على نفس الحضور، وهو الشي اللي كيشكك فيه بعض الفاعلين داخل البام فحالة كوكوس.

علاقة كوكوس بقيادات البام مؤخرا ماشي حتى لهيه، خصوصا فاش كذبات بخصوص تأجيل المجلس الوطني للحزب بمبرر انها مريضة، لكن ف نفس النهار لي غايكون فيه المجلس الوطني كانت ناشطا ف عرس لولد سفيرة مغربية.

فالمقابل، دائرة أنفا داخلة على سباق مبكر وسخون، فيه حضور نسائي قوي، حيث كيتداولو أسماء بحال فاطمة التامني عن فيدرالية اليسار، ولطيفة الشريف عن الاتحاد الاشتراكي، وحتى نبيلة الرميلي، عمدة الدار البيضاء، اللي ممكن تقود لائحة التجمع الوطني للأحرار إذا تبدلات الحسابات الداخلية ديال الحزب.

وكاين حتى أسماء أخرى كتوجد راسها وكتسخن كتافها، بحال جواد رسام، وحسان البركاني عن حزب الاستقلال، إضافة إلى عبد الصمد حيكر عن العدالة والتنمية، رغم أن حظوظ هاد الأخير كتبان محدودة فظل تراجع الحزب.

خروج نبيلة منيب من السباق المباشر فأنفا زاد بدورو كيوضح أن الأحزاب بدات كتدير حساباتها بكري، وكتختار المرشحين اللي عندهم أكبر حظوظ.

فهاد السياق، ترشيح كوكوس كيبان بالنسبة للبام محاولة للحفاظ على التوازنات داخل الدائرة باش ميخليوش المقعد الفارغ، ولكن السؤال الكبير اللي مطروح عند اعضاء البام فهاد الدائرة هو واش الحزب غادي يغامر باسم ما عندوش نفس الحمولة الانتخابية والثقل الشعبي ديال الناصيري، ولا غادي يدير “مفاجأة” بترشيح وجه نسائي.

دائرة أنفا غادي تبقى مفتوحة على جميع السيناريوهات، ومع اقتراب تشريعيات 2026، الصراع فيها غادي يكون واحد من أقوى المعارك الانتخابية بجهة الدار البيضاء.