عمرها كانت فتاريخ قطاع الصحة.. 8000 بوسط فـ2026 لتعزيز الموارد البشرية وتقليص الخصاص منها 1000 بوسط للأطباء الداخليين .

مصدر الصورة

كود الرباط//

كشف مصدر مطلع ل”گود” أن وزارة الصحة والحماية الاجتماعية غادي دير واحد الخطوة غير مسبوقة فتاريخ القطاع، بإحداث 8000 منصب مالي مخصص لتوظيف مهنيي الصحة برسم السنة المالية 2026، وهو رقم عمر القطاع ما عرفو دفعة وحدة.

هاد الرقم كيعكس، حسب نفس المصدر، الدينامية اللي كيعرفها القطاع الصحي فالمغرب، خصوصا وأنه كيمثل الضعف ديال المناصب اللي كانت فتحت سنة 2019 (4000 منصب فقط). وكيجي هاد القرار فإطار تسريع الإصلاحات الهيكلية للمنظومة الصحية، وتقوية العرض الصحي، وتقليص الخصاص الكبير اللي كتعاني منو بزاف ديال الجهات.

وتم تخصيص 1000 منصب مالي للأطباء المقيمين، فخطوة الهدف منها دعم التخصصات الطبية وتجويد التكوين، خاصة مع تنزيل ورش المجموعات الصحية الترابية، اللي كيراهن عليها لإعادة تنظيم المنظومة الصحية ورفع جودة الخدمات الاستشفائية.

أما باقي المناصب، فتوزعات على المديريات الجهوية للصحة والحماية الاجتماعية، وفق معايير “علمية وموضوعية”، كتأخذ بعين الاعتبار منها حجم الخصاص فكل جهة والضغط على المؤسسات الصحية، الكثافة السكانية، تعويض المتقاعدين، وافتتاح مشاريع صحية جديدة.

وغادي تكون للمديريات الجهوية صلاحية توزيع هاد المناصب حسب التخصصات والدرجات، عبر مقاربة تشاركية، باش يتم توفير أطباء عامين، ممرضين وتقنيي صحة، إضافة إلى إدماج خريجي المعاهد العليا والتكوين المهني فالميدان الصحي.

الهدف النهائي من هاد العملية، وفق نفس المصدر، هو تحقيق عدالة مجالية فالموارد البشرية الصحية، وتحسين الأداء العام للمنظومة، والوصول تدريجيا لـالاكتفاء الذاتي على مستوى كل جهة، مع تطوير التكوين والتحفيزات لضمان خدمات صحية ذات جودة لجميع المغاربة.