الوزير مزور باغي مقعد برلماني فبنسليمان وخايف يطيح..معول على "عائلة سياسية" من الأحرار عندها نفوذ فالمنطقة وها شكون .

منذ

كود الرباط//

علمت “كود” من مصدر مطلع، رياض مزور، وزير الصناعة والتجارة، باغي يدير صفقة “سياسية” مع عائلة عكاشة ف اقليم بنسليمان، باش يتمكن من الفوز بمقعد برلماني فيها.

مزور، الوزير الاستقلالي للي مكتجمعوش شي علاقة قوية ببنسليمان ومكيزورهاش بزاف، وقليل فاش كيمشي ليها، باغي يترشح فيها للانتخابات المقبلة، ولكن “مضامنش يجيب مقعد”، وهادشي دفعو يقلب على دعم سياسي من عائلة عكاشة للي عندها نفوذ قوي فالمنطقة.

ورغم أن ياسين عكاشة، البرلماني الشاب عن حزب الأحرار ورئيس جماعة مالين الواد، لم ينفي ولم يؤكد فعلا وجود اتفاق بين عائلته والوزير وزير، إلا أنه رحب في اتصال مع “كود” بترشح الوزير مزور.

وقال عكاشة في حديثه مع “كود” :”بحكم أنه وزير، كاين تواصل مع مزور ف عدد من الملفات للي كادخل ف مصلحة المنطقة وتنميتها”، مشددا بلي :”للي باغي يدفع بعجلة التنمية فالمنطقة حنا مساندينو وندفعو به”.

بالنسبة لعكاشة، فإن ترشح أي واحد باش يخدم المنطقة مغاديش يلقى سوى الدعم والتنسيق معه. يعني “مرحبا بمزور بلا ما يخاف يطيح لو مقعد” يوضح مصدر حزبي لـ”كود”.

بنسليمان فيها دواوير ومناطق جد فقيرة، رغم الخيرات للي كتنعم بها، خصوصا مع الأمطار لي طاحت. وف نفس الوقت هاد المنطقة غادي تعرف بناء أكبر ملعب ف المغرب ومعلمة كروية ديال ملعب الحسن الثاني.

وعرفت بنسليمان ف السنوات الأخيرة، مشاريع تنموية كبيرة همت عدة جماعة، خصوصا جماعة سيدي بطاش للي فيها دواوير مهمشة. مشاريع بملايين الدراهم. لعبت فيها عائلة عكاشة دور كبير ف جلبها للمنطقة.