من الگارو حتى لپيپة... قصة المرشد علي خامنئي مع البلية .

كود – عثمان الشرقي //

خرجو تصاور للمرشد الإيراني علي خامنئي فمراحل من حياتو وهو كيكمي البيبة، هاد الشي جا من بعد ما كان كيكمي الگارو فشبابو قبل الثورة يعني فزمان الشاه.

شي تصاور كيبان فيها خامنئي كيكمي البيبة فمؤتمر عام ديال لحزب “الجمهوري الإسلامي” عام 1979، وكان گالس حداه شي قيادات كبار بحال هاشمي رفسنجاني وآية الله بهشتي، وفصور أخرى، باين وهو كيكمي الغليون فواحد الحوار صحفي عام 1980 ملي كان مشرف عام على الحرس الثوري الإيراني.

مصدر الصورة

تقارير كتقول باللي خامنئي حبّس الݣارو ملي ولا رئيس للجمهورية الإسلامية الإيرانية عام 1981، وهاد القرار جا بتوصية من المرشد الأول ومؤسس الجمهورية آية الله الخميني قبل مايبدلو بالبيبئة مني ولا مرشد .

المخرج الإيراني محسن مخملباف كتب واحد التقرير طويل سميتو “أسرار حياة خامنئي” من بعد أحداث “الانتفاضة الخضراء” عام 2009، وكشف فيه بزاف ديال الأمور على حياة المرشد، من بينها مراحل الكماية ديالو من الݣارو لبيبة وقال إن خامنئي فالأول كان غير كيتيكيف گويرويات عادي، وكان كيدير الباكية فجيب ديال الجاكيت بحال أي كماي، ولكن من بعد ما وللا رئيس للجمهورية، حبّس الگارو باش يبان كلاص وبدلو بالبيبة لي تبلا بها.

مصدر الصورة

المخرج محسن قال بلي خامنئي كانت عندو مجموعة كبيرة ديال البيبات، كتفوت 200 غليون، وقيمتها تقريباً 2 مليون دولار، واكد البيبة ثمنها بوحدها 250 ألف دولار، تصنعات قبل من 300 عام، ومغطية بالذهب ومرصّعة بالحجر الكريم. هاد البيبات جاوه كادويات من رؤساء دول وزعماء عالميين.

المخرج نفى الإشاعات اللي كتقول باللي المرشد كيكمي الأفيون، غير هو كان كيخلي لبعض الشعراء المقرّبين ليه، بحال علي معلم وشهريار وسبزواري، يكميوه بلا ما شي حد يحبسهم، وحتّى كان كيوصي يتوفّر ليهم بحقهم منو على حساب بيت المرش.

مصدر الصورة