موقع كود بالضبط لي المقر ديالو فالعيون خاصك ليه يوماين وعشرالاف ريال ديال المركوب باش توصليه، هو لي حط مادة جاء فيها ان مبادرة المنطمة المغربية لحقوق الانسان غادي تخلي المغاربة يتخايلوا بلي الصحفيين كيخدموا في الهامش في الشوارع والمقاهي، وعلى فين كيخدموا بالسلامة سواء في المغرب أو في العالم، الصحافة مهنة سائلة تسيل في الشوارع والمقاهي والحانات والجوامع والزوايا وفي كل بلاصة .

مصدر الصورة

محمد سقراط-كود///

أغلب المصورين الصحفيين في المغرب وخصوصا لي خدامين في الصحافة الالكترونية كيخدموا من القهاوي وهادشي جاري بيه العمل، أولا من الباب السرعة والفعالية وتحقيق للسبق، فاش كيصور راه هاز معاه پيسي ديالو كيدوز لأقرب قهوة يقطع ويحط الفيديوات او يسيفط المواد، وتانيا قلال المواقع لي عندهم مقر في كل مدينة وحي ودوار وقرية، وحتى الى كانوا راه باش تصور فشي بلاصة نواحي كازا وترجع حتى للمقر وتمونطي عاد تحط راه برد الخبر، وفي رمضان بالخصوص هاد الفئة من الصحفيين كتعاني بسباب اغلاق المقاهي، ومايمكنش ليهم يخدموا في أي بلاصة حيت أصلا كيكونوا هازين معاهم ماتريال غالي، بين الكاميرة والتيليفون والميكرو والپيسي فين كيمونطي، ولمثل هاد الأسباب المنظمة المغربية لحقوق الإنسان عرضات المقر ديالها في أگدال للصحفيين يجيو يخدموا فيه على خاطرهم، وهادي مبادرة زوينة مشكورين عليها، وعوض يتم شكر المنظمة على هاد المبادرة وقع العكس وفي موقع گود.

موقع كود بالظبط لي تاواحد من الطاقم ديالو كيخدم انطلاقا من المقر في العيون خاصك ليه يوماين وعشرالاف ريال ديال المركوب باش توصليه، هو لي حط مادة جاء فيها ان مبادرة المنطمة المغربية لحقوق الانسان غادي تخلي المغاربة يتخايلوا بلي الصحفيين كيخدموا في الهامش في الشوارع والمقاهي، وعلى فين كيخدموا بالسلامة سواء في المغرب أو في العالم، هاداك الصحفي ديال المقر كان في التسعينات ونقارض في الألفينات، راه في ميريكان وكيخدموا في ستارباكس وكيديرو فيها اجتماعات، وخصوصا المواقع الصغيرة لي غير مقاتلة مع الوقت، بالاظافة المادة مكتوبة بعقلية ديال اعلام الجزائر، الصحفي عندو النيف وميرضاش، تا كيفاش الصحافيين عندهم مقرات ومؤسسات، إييه كاينين ولكن واش كاينين في كل زنقة وكل مدينة، شحال من موقع مغربي عندو مقر في أكدال في الرباط، ومقر آخر في كازا وفي كل مدن المغرب، هاد المقرات كاينين غير في مخيلة الكاتب، وأصلا قوة الصحافة الالكترونية راه في انعدام المقرات ماشي العكس، الصحفيين ماشي موظفين ديال المقاطعة خاص ضروري يپوانتيو في الصباح، الصحافة مهنة سائلة تسيل في الشوارع والمقاهي والحانات والجوامع والزوايا وفي كل بلاصة.

والمقال لي كينتاقد هاد المبادرة ديال المنطمة المغربية لحقوق الإنسان كانت فيه عدوانية مجانية اتجاه نوفل البوعمري والذي جاء من مهنة المحاماة ومنعرف شنو، السيد كنعرفوا بشكل شخصي من اظرف الناس وكان كيدافع عليا فاش تشديت، وإستهدافه بهاد الشكل بليد ومعندو معنى ومجانب للحقيقة، هاذشي لي جا في داك المادة: ” وهاد الرئيس الجديد ديال المنظمة، اللي جاي من قطاع المحامين، كان حري بيه يحترم هاد المهنة كيفما كيحتارمو الصحافيين مهنة المحاماة. قبل ما يطلق بلاغات بهذا الشكل، خاصو يستشير، خاصو يتأكد، وخاصو مايحطش الصحافة فموقع اللي هي فغنى عنه”.المفارقة أن الصحفيين لي طلبوا منو هاد المبادرة وهو استجب ودار بلاغ لوحدين خريين، مكانش يستاهل يترد عليه بهاد العدوانية خصوصا في موقع أغلب طاقمه خدام من القهاوي، هاد المقال نيت تكتب من القهوة.