خاص.. واش مراحل تطبيق الحكم الذاتي فالصحراء غاتفرض تأجيل الانتخابات ديال 2026؟ .

مصدر الصورة

كود الرباط//

لأول مرة فتاريخ الانتخابات فالمغرب، وعلى بعد 6 أشهر فقط على الانتخابات التشريعية ديال مجلس النواب المرتقبة نورمالمون ف شتنبر 2026، كاين واحد الجو سياسي جامد فبلادنا، ولدرجة أن البعض كيتساءل ويقول واش كاينة ريحة شي انتخابات لا داخل الأحزاب، ولا فالدوائر الانتخابية، ولا حتا فمقرات الولايات والعمالات والأقاليم. والو، الصمت يسود واخا شي أحزاب، وخاصة ديال الأغلبية، مرة مرة كيديرو شي اجتماع باش يناقشو بعض الأمور للي لا علاقة لها بالاستعداد الحقيقي للانتخابات.

واش باقي ما تعطاش الضو الأخضر؟ ولا الأمر متعلق بموضوع أكبر له علاقة بالمفاوضات الجارية حاليا بين المغرب والأطراف المعنية (الجزائر، وموريتانيا وبوليساريو)، تحت إشراف الأمم المتحدة، ومواكبة الإدارة الأمريكية، لتطبيق قرار مجلس الأمن 2797 الخاص بإنهاء النزاع حول الصحراء وتطبيق الحكم الذاتي تحت السيادة المغربية؟

مصادر “كود” قالت بللي المفاوضات تتجه تدريجيا نحو اعتماد وثيقة الحكم الذاتي المحينة والمفصلة للي قدمها المغرب لكي تكون الأرضية الوحيدة للمفاوضات، وهي الأرضية للي بطبيعة الحال غا يكون فيها نقاش وأخد ورد، قبل أن يتم الإعلان رسميا، في غضون الأشهر القليلة المقبلة، عن دخول هذا النزاع مرحلة تفعيل الحل السياسي وفق مقترح الحكم الذاتي، وهاد الإعلان من المرتقب أن يتم تضمينه فالإحاطة للي غا يقدمها المبعوث الأممي ستيفان دي ميستورا لمجلس الأمن في أواخر أبريل المقبل.

على هاد الأساس، كاينين بعض السياسيين والمختصين ف الملف للي كيطرحو ضرورة وجود “مرحلة انتقالية” لتنزيل الحكم الذاتي وللي بطبيعة الحال غا تفرض تعديلات دستورية وإقرار قوانين تنظيمية وتدابير إدارية ومؤسساتية مرتبطة بهذا التحول الكبير في بنيات الدولة.

بعض السياسيين والخبراء كيقولو بللي هذا الورش الكبير خاصو استشارات موسعة مع كافة الفرقاء، وخاص تكون فيه مواكبة تشريعية وقانونية وإدارية واسعة، وهاد الشي للي كيستوجب تأجيل الانتخابات ديال 2026 وتمديد ولاية مجلس النواب لسنة أخرى. وهادي ماشي أول مرة بلادنا كتقصر ولا تمدد من الولاية التشريعية ديال البرلمان لأسباب موضوعية.

ورغم أن هاد الأمر قد يبدو للبعض مستبعدا، لكنه في الحقيقة مطروح على الأجندة ومسار المفاوضات هو للي غا يحدد القرار المناسب فيه.

كاين لي كيشوف، وفق أحاديث “كود”، مع سياسيين، بلي المنطق السليم وحتى وزير الداخلية صرح اكثر من مرة بلي الانتخابات البرلمانية غاتكون فوقتها. لسبب وجيه هو أن هاد الحكومة الحالية كلها أعطاب سياسية وغير متجانسة وعامرة أخطاء وحروب ومصالح، لذلك خاص حكومة جديدة لتنزيل الحكم الذاتي، والإشراف على المرحلة الانتقالية قبل الانتخابات الجهوية والجماعية.