ماشي معقول البوليسي المغربي في 2025 باقي محتاج يستخدم الجسد ديالو باش يوقف المخالفين خصوصا في مدينة بحال الرحمة لي سبق لبوليسي تعرض لعملية إرهابية، خاص البوليس يتعطاهم الكلاشينكوف ويتجهزو مزيان لمحاربة الجريمة، سبرديلة وسروال دجين مابقاوش كافيين نهائيا، أي بوليسي واقف في الشارع داير باراج خاصو يكون مسلح ولابس واقي من الطعن، راه كاين كيلبسوه في كوريا، ويكون مدرب ومحضر لمختلف التدخلات، ماشي كل مرة كتشوفوا مرة بوليسي جارو طريبورطور مرة معلق في الكابو ديال نقل العمال بحال لي وقع في طنجة، هادشي لايليق بجهاز أساسي يسهر على أمن المغاربة.

البوليس في المغرب تطورروتقدم ولكن في مجال حقوق الإنسان كثر من حقوق البوليس براسو، داك الحگرة والتحنكير أي كانوا شحال هادي مابقاوش، دابا البوليس شباب قاريين مربيين محترمين نقيين لابسين مزيان، ولكن في التدخلات الميدانية كيلقاو راسهم شبه عزل في مواجهة المجرمين وأمهاتهم وخواتاتهم، شحال من فيديو ديال برليسي جابد فردي على مجرم وكتجي ختو توقف بيناتهم ، هادشي مكاينش في الدول لي ختارعات حقوق الانسان بحال ميريكان وفرنسا، وفي بزاف ديال المرات البوليسي كيلقى راسو كيحارب الجريمة بكسوة ومينوط وفردي خاصو مايخرج قرطاسة حتى يدوز من السراط المستقيم، وهادي من أسباب السيبة لي خالقين المجرمين وصحاب الماطر عموما في شوارعنا.

الموطور أو الطوموبيل فاش كيكونوا عند واخد خارق القانون راهم سلاح خطير يمكن يقتل بيهم ويعوق ويدير حتى عمليات إرهابية، ومايمكنش تواجه أسلحة قاتلة بالجسد ديالك فقط، هاداك الفيديو ديال البوليسي لي تلاح قبالت مول موطور راه عبثي وماشي في صالح صورة البوليس في المغرب، واحد جاي بموطور بسرعة كبيرة راه بحال الى جاي عندك بفردي او جنوي، راه قاصدك بسلاح قاتل ماخاصش تعرض ليه وسط الطريق، وخاص تكون مجهز لوجيستيكيا ومحمي قانونيا، وعندك كامل الصلاحيات باش تدخل بما يناسب خطورة الموقف، هاداك راه تحييد خطر قاتل وماشي مجرد توقيف مخالف للقانون روتيني، تدخلات بدائية بحال هادي راه كتقيس هيبة جهاز الشرطة في البلاد، تهلاو في الدراري وجهزوهم عاد حطوهم في الشارع باش مايزعم عليهم تاواحد.