عزلة بركة وسط التحالف الحكومي.. "زواج سياسي" بين البام والأحرار قبل شهور قليلة من الانتخابات .

مصدر الصورة

كود الرباط//

علمت “كود” من مصدر في الأغلبية الحكومية، بلي تجربة خمس سنوات من تدبير الخلافات بين هاد الأحزاب وضحات بلي كاين انسجام وتنسيق كبيرين بين البام والأحرار، في المقابل “حزب الاستقلال كان ديما مصدر الخلافات والمشاكل وسط التحالف”.

وقال مصدر في الأغلبية لـ”كود” بلي انسجام البام والأحرار تقوى أكثر مؤخرا، وغالبا غايبقا التحالف بيناتهم مور هاد الانتخابات المقبلة للي غاتكون ف أواخر السنة.

وبخصوص علاش مكاينش انسجام قوي مع حزب الاستقلال، أوضح ذات المصدر لـ”كود” بلي “على مستوى التنسيق والتحالفات فتشكيل المجالس المنتخبة، كان ديما الاستقلال كيخوي بالتحالف وكينقلب عليه وأمثلة كثيرة خصوصا فتازة وايت ملول وعدة مدن”.

وشدد ذات المصدر أن تجربة خمس سنين من التحالف داخل الحكومة والمجال المنتخبة (الجماعات الترابية، المجالس الاقليمية، مجالس الجهات) أكدت بلي “التنسيق” أقوى بكثير بين البام والأحرار.

لذلك يوضح ذات المصدر بلي كاين نوع من التحالف بين البام والأحرار باش يقطعو الطريق على حزب الاستقلال للي عندو مواقف محافظة ولعب أدوار سلبية فتحديث عدد من القوانين، ناهيك عن لعبه دور المعارضة في كل ويكاند. إضافة إلى ذلك، فكل انتخابات فهاد 10 سنين الأخيرة، الترحال السياسي بين البام والأحرار حطم الرقم القياسي، فعدد من وجوه الأحرار هي “إكس بام” والعكس صحيح.

وتشير التوقعات، بلي أحزاب الأغلبية حظوظها قوية باش تحافظ على المراتب الثلاثة الأولى، خصوصا وأن المعارضة باقا ضعيفة ومقدراتش تواكب هاد الاحزاب تنظيميا وسياسيا وتواصليا، باستثناء حزب التقدم والاشتراكية لي دار استقطابات مهمة مؤخرا، ومرشح يطلع ف عدد مقاعد ديالو ف 2026.