اعترافات رئيس لجنة حكام الكاف معطى كايزكي قوة الموقف المغربي والمغرب غايزمظ الكونفدرالية الضعيفة إلى مشى للفيفا والطاس .

مصدر الصورة

گود سبور//

كايعيش الاتحاد الإفريقي لكرة القدم وضع صعيب ومعقد، بسبب أزمة نهائي كاس أفريقيا “المغرب2025″، وعدم تطبيق القانون على المنتخب السنغالي المنسحب من النهائي امام المنتخب المغربي، سوى خلال المباراة من خلال حكم الماتش، او بعد المباراة من خلال لجنة الانضباط وهذا الشي كايخلي مؤشرات الفساد داخل الكاف تزيد تعطي ريحتها والصورة ديال الجهاز كامل كاتخسر.

المعطيات الأخيرة اللي كاتقول ان رئيس لجنة الحكام بالاتحاد الافريقي لكرة القدم، اعترف خلال اجتماع المكتب التنفيذي للكاف برئاسة باتريس موتسيبي، انه قال للحكم ديال النهائي باش ما يعطيش بطائق صفراء لكل لاعبين المنتخب السنغالي بعد انسحابهم من الماتش ورجوعهم للتيران ملي دازت كثر من 13 دقيقة، غير باش الفينال يكمل، وانه كان من المفروض تطبيق القانون وياخدو بطائق صفرا، راه قنبولة كاتحط الاتحاد الافريقي كلو قدام شوهة وفضيحة كبيرة.

وهذا الشي راه كايعزز موقف المغرب من خلال الجامعة الملكية المغربية لكرة القدم، حيث إلى ما تنصفتش من طرف لجنة الاستئناف بالكاف فالطعن اللي تقدمت به على قرارات لجنة الانضباط اللي عطات عقوبات خفيفة بزاف للسنغال اللي انساحبو وما احتارموش قرار الحكم بالإعلان ضربة جزاء للمغرب، والأكثر من هذا سارات الظالم مع الظلوم وعاقبت المنتخب المغربي و 2 لاعبين مغاربة، وسط ذهول واستغراب متتبعي كرة القدم فالعالم، راه الجامعة الملكية المغربية لكرة القدم، بامكانها اللجوء بهاد المعطيات اللي عندها زائد هذه المعطيات الجديدة اللي فيها اعترافات رئيس لجنة الحكام بالكاف، إلى الاتحاد الدولي لكرة القدم اللي أصلا الرئيس ديالو جياني انفانتينو كان حاضر فالفينال وشاف فضيحة السنغال، وطالب الكاف بتطبيق القانون، بالإضافة إلى أن المغرب يقدر يمشي لمحكمة الدولية للتحكيم الرياضي، باش يدافع على الحقوق ديالو والظلم اللي تعرض له المنتخب الوطني المغربي فالفينال الشهير.

الجامعة الملكية المغربية لكرة القدم، مازال متشبثة بالموقف ديالها وهو الدفاع عن حقوق المنتخب المغربي فهاد الفينال، وعدم حضور رئيس فوزي لقجع اللي هو نائب رئيس الاتحاد الأفريقي لكرة القدم، لاجتماع المكتب التنفيذي للكاف البارح الجمعة بتنزانيا، معطى يؤكد ان الجانب المغربي ما غاديش يقبل بالوضع الحالي فالكاف، وانه غادي يمشي لأبعد نقطة فالدفاع على الحقوق ديالو، في إطار المؤسسات وإلى ما نصفوش الكاف غادي يمشي للفيفا، ومنها غادي يمشي للطاس حتى ياخد الحق ديالو، بعد الظلم اللي تعرض له فالفينال ضد منتخب سنغالي اللي ربح كاس افريقيا بفضيحة تاريخية وبلا روح رياضية وبشوهة عالمية.