نشرة إنذارية: شتا رعدية قوية ورياح عاصفية فعدد من الأقاليم والثلج فمرتفعات أكثر من 1700 متر .

مصدر الصورة

عمر المزين – كود//

خرجات المديرية العامة للأرصاد الجوية بنشرة إنذارية محيّنة كتفيد باللي مجموعة من مناطق المغرب غادي تعيش، من زوال نهار السبت حتى لنهار الأحد، تقلبات جوية قوية، فيها شتا رعدية مهمة، ورياح عاصفية محلية، إضافة لتساقطات ديال الثلج فالجبال العالية.

ووفق النشرة ديال المديرية، فمنتظر تنزل شتا ما بين 40 و70 ملم فعمالات وأقاليم شفشاون، الحسيمة، القنيطرة، وزان، تطوان، العرائش، تاونات وتازة. أما ما بين 30 و40 ملم فغادي تهم طنجة–أصيلة، المضيق–الفنيدق، سيدي سليمان، بن سليمان، برشيد، الدار البيضاء، مديونة، الخميسات، خنيفرة، سيدي قاسم، سلا، مولاي يعقوب، فحص أنجرة، المحمدية، النواصر، الرباط، تمارة–الصخيرات، الجديدة، بني ملال، مكناس، الحاجب، إفران، فاس وصفرو.

وهاد الشتا غادي تبدا، حسب النشرة اللي توصلات بيها “كود”، من الثلاثة ديال العشية نهار السبت حتى لثمانية دالصباح نهار الأحد.

النشرة حذّرات كذلك من رياح عاصفية قوية ممكن توصل السرعة ديالها ما بين 85 و100 كلم فالساعة، خصوصاً ففحص أنجرة، طنجة–أصيلة، العرائش، القنيطرة، الحسيمة، شفشاون، تطوان، المضيق–الفنيدق وتاونات، من زوال السبت حتى لصباح الأحد. وكاينين رياح أقل شوية، ما بين 75 و85 كلم فالساعة، فمناطق بن سليمان، برشيد، الرباط، سلا، تمارة–الصخيرات، الدار البيضاء، مديونة، المحمدية، الجديدة والنواصر.

وبالنسبة للثلوج، فالأرصاد الجوية كتوقّع تساقطات مهمة فوق المرتفعات اللي كتفوت 1700 متر، حيث ممكن توصل السماكة ما بين 20 و40 سنتيم فبولمان، كرسيف، تازة وصفرو، وما بين 10 و20 سنتيم فأزيلال، بني ملال، ميدلت وإفران، وهاد الحالة غادي تبدا من نص الليل ديال السبت حتى لـ11 ديال الليل نهار الأحد.