قال الحسين يوعابد، المسؤول عن التواصل بالمديرية العامة للأرصاد الجوية، أن يوم غد السبت غادي يتشكّل منخفض جوي أطلسي جديد سُمّي “مارتا” فوق المحيط الأطلسي، ومن المنتظر تمتد التأثيرات ديالو نهار السبت والأحد لتشمل جنوب فرنسا وإسبانيا والبرتغال، وغادي يكون عندو تأثير غير مباشر على شمال المغرب.

وأضاف يوعابد، في تصريح لـ”كود”، أن هاد المنخفض غادي يهم بالأساس المناطق الشمالية ديال البلاد، خصوصا اللوكوس وطنجة والريف، وزيد عليهم مرتفعات الأطلس.

ومن المرتقب، حسب المسؤول نفسه، تنزل أمطار وزخات أحيانًا رعدية بمناطق طنجة واللوكوس والريف وسايس والغرب، وأمطار أخرى فالأطلس المتوسط والكبير والسهول الغربية المجاورة، مع استمرار التساقطات فالسواحل الأطلسية شمال الصويرة.

وبالنسبة للثلوج، أكد يوعابد أن التساقطات غادي تبدا فالأطلس من علو 1600 متر، وفالريف من 1400 متر، مع رياح قوية إلى قوية فالمناطق الشمالية والوسطى والأقاليم الصحراوية، إضافة لاضطراب حالة البحر. ووضّح بأن الأمر ماشي عاصفة مباشرة أو استثنائية، ولكن مجرد امتداد لمنخفض أطلسي نشيط.

كما أشار إلى أن الأجواء غادي تبقى ملائمة للتساقطات المطرية فالشمال الغربي والريف حتى لنهار الاثنين، قبل ما تميل الحالة الجوية للاستقرار النسبي والتدريجي مع مرور سحب عابرة ابتداءً من الثلاثاء، ومع رجوع المرتفع الجوي اللي غادي يخلي الجو يستقر ابتداءً من الأربعاء.

وبسبب استمرار هاد الأجواء الممطرة، نصح يوعابد المواطنين عبر “كود” بضرورة توخي الحيطة والحذر، خصوصًا فالمناطق اللي كتجمع فيها الما، وتفادي المجازفة بعبور الوديان والمنحدرات، واللجوء لأماكن آمنة كإجراء وقائي، مع الحرص على متابعة توصيات السلطات وتجنب الشواطئ نهاية هاد الأسبوع، وتتبع الإنذارات الرسمية بشكل مستمر.