احتجاج صحاب الكسوة الكحلة ضد وهبي قدام البرلمان.. واش المحامين محميين بحزب الاستقلال باش يديرو بلوكاج لقانون المهنة ومايتحالش للبرلمان نهائيا؟ .

كود الرباط//

جمعية هيئات المحامين بالمغرب، ضغطت بقوة باش تبلوكي مشروع قانون مهنة المحاماة للي جابو عبد اللطيف وهبي وتمت المصادقة عليه من طرف الحكومة. لحد الساعة نجحت جمعية المحامين دير الفرملة لهاد القانون بحيث سالات دورة اكتوبر فالبرلمان بلا ما يتم احالة المشروع على مكتب مجلس النواب.

ورغم ان المحامين نجحو يعطلو مسطرة المناقشة والمصادقة عليه فالبرلمان، فراه باقي عندهم امل باش هاد المشروع ميخرجش كاع للوجود، خصوصا وان اطراف وسط الحكومة كاتزيد تشعل العافيا فهاد الملف، خصوصا حزب الاستقلال لي حرك ذراعو ف المحامين وشارك ف الوقفة الي كانت اليوم فالرباط.

مصدر الصورة

مئات من صحاب البذلة الكحلة نزلو للرباط قبالت البرلمان، والهدف واحد هو اسقاط هاد المشروع، يعني ميخرجش دبا حتى يمشي وهبي من وزارة العدل، حيث عارفين بلي وهبي استطاع فهاد الولاية الحكومية يخرج مشاريع قوانين كانت حبيسة الرفوف وراجع قوانين عمرها تعدلت منذ الاستقلال.

ورغم هاد الاحتجاج، سبق لوزير العدل عبد اللطيف وهبي ان اعلن في مجلس المستشارين، استعداد الوزارة على أي مقترحات لتعديل مواد مشروع القانون.

مصدر الصورة

القضية ديال الخلاف بين وهبي والمحامين، ماشي غير اختصاصات قانونية او مشاكل عندها علاقة باستقلال المهنة، بل القضية فيها ميمي والفلوس، المحامين كيتحفظو على مسألة الإيداعات والالتزامات المالية للي مرتبطة بأموال الغير وإلزامية إيداعها بصندوق الإيداع والتدبير على غرار ما هو معمول به لدى فئات مهنية أخرى.

ومن بين النقاط الخلافية الساخنة فمشروع تعديل قانون مهنة المحاماة، كاين مقترح تقدم به وزير العدل عبد اللطيف وهبي، كيتعلق بإمكانية ولوج كتاب الضبط لمهنة المحاماة، ولكن بشروط اعتبرها المحامون مرفوضة.

وحسب نفس المصدر، فوهبي اشترط على موظفي كتابة الضبط الراغبين في ولوج مهنة المحاماة، التوفر على شهادة الدكتوراه، مع عشر سنوات على الأقل من الممارسة داخل المحاكم.

مصدر الصورة