ضربة قاصحة لبنت الباشا. نهاية امبراطور الفروماج بن الضو يقدر ينهي حلم هاد "الوافد الجديد" يوصل لرئاسة الحكومة. المنصوري ضحات بابو الغالي على قبال المهرب السابق للمواد الغذائية وكانت معولة عليه يربحها "كازا" .

مصدر الصورة

كود هناء ابو علي ////

“هاد لخبار ديال بن الضو عبد الرحيم الامين الجهوي للبام فكازا راه كيعني ضربة كبيرة لفاطمة الزهرا المنصوري لحزب الاصالة والمعاصرة”. هاد لكلام اعتارف بيه قيادي فهاد الحزب. التوقيت بالنسبة ليه ماشي مجاني والمستهدف هو الحزب والمنسقة الوطنية للحزب. كيقصد بنت الباشا. البام ف3 سنين جاتو 3 ضربات قاصحة فجهة الدار البيضاء. كان اعتقال سعيد الناصري رجل البام القوي فقضية “اسكوبار الصحرا” ومن بعد اختارت المنصوري ضحي بابو الغالي صلاح عمدة مديونة واحد القادة الثلاث اللي كيسير البام. ضحات بيه فقضية تجارية كانت بينو وبين هاد لملايري مول لفروماج اللي بدا حياتو فالتهريب من الشمال للمواد الغذائية.

القصة وما فيها ان بن الضو تفاهم مع عائلة ابو الغالي على شراء شي ارض. هو راه شاري من عندو بزاف. وقع خلاف عادي ناض ابو الغالي باعها لابراهيم مجاهد اللي حتى هو فالبام وكان رئيس جهة بني ملال. بنت الباشا دخلات فهاد القضية وناصرات بن الضو. جمد حزبها عضوية ابو الغالي وكانت معركة بيناتهم فالاعلام والقضاء….

المهم تقريبا اقل من عام طاح الخبر ديال احالة مول لفروماج على قاضي التحقيق باستئنافية كازا فقضية عندها علاقة بالفروماج ووو. قاضي التحقيق من بعد حيد ليه الباسبور وسد عليه الحدود هو وجوج من لونسا. واحد كان مكلف فميناء طنجة المتوسط والثاني كان مكلف بميناء كازا.

المنصوري راهنات على بن الضو يربحها مقاعد فكازا فالانتخابات التشريعية لهاد العام. هي عارفة باللي اللي ربح مقاعد كثر فهاد لمدينة عندو احتمال كبير يربح الانتخابات التشريعية. شفناها ف3 انتخابات التشريعية الاخيرة اللي دارت فبلادنا. البي جي دي جوح مرات جاو اللولين فكازا ووطنيا والمرة الاخيرة جاب الاحرار مقاعد كثر من منافسيه ودا رئاسة الحكومة.
عليها وقع زلزال فالبام. دابا لمدينة عايشة مشاكل كثيرة. النوطير كاتب الدولة المكلف بالشغل هشام الصابيري ما يقدرش على هاد لمدينة. البام مع غياب سعيد الناصري اللي كان المخطط وبن الضو المنفذ كان ممكن يربح مقاعد اكثر هاد الانتخابات. دابا بجوجهم متابعين. شي داحل الحبس وشي خارجو.

المنصوري دارت اختيارات. طلعات خاطئة. هاد الوافد الجديد اي البام اللي جا فظروف غريبة وسوقوه باللي باغي يجدد الثقافة الحزبية فالمغرب طلع كيشبه لكاع الاحزاب. ما جاب جديد. حلمو فرئاسة الحكومة غادي ويبعد.